ఆంధ్రప్రదేశ్ మాజీ ముఖ్యమంత్రి, దివంగత నేత వైఎస్ రాజశేఖర్ రెడ్డి పాద యాత్ర నేపథ్యంగా తెరకెక్కిన చిత్రం 'యాత్ర'. మలయాళ సూపర్ స్టార్ మమ్ముట్టి ప్రధాన పాత్రలో నటించిన ఈ చిత్రం ఈ నెల 7న విడుదల కానుంది. ఇటీవలే విడుదలైన ఈ సినిమా ట్రైలర్, పాటలకు మంచి రెస్పాన్స్ వస్తుంది. 

అయితే.. తాజాగా అమెరికాలో యాత్ర ఫస్ట్ షో టికెట్ వేలం వేయటం జరిగింది. 70ఎమ్ఎమ్ ఎంటర్టైన్మెంట్స్, నిర్వాణ సంస్థలు యూఎస్ లోని సీటెల్ లో ప్రీమియర్ షో మొదటి టికెట్ వేలం వేయగా రూ. 4.37 లక్షలు ధర పలికింది. మునీశ్వర్ రెడ్డి అనే ఎన్ఆర్ఐ 6,116 డాలర్లకు అంటే దాదాపు 4.37లక్షలకు వేలం పాడి మొదటి టిక్కెట్టును గెలుచుకున్నారు. 

టాలీవుడ్ లో ఇప్పుడు బయోపిక్ ల హంగామా నడుస్తుంది. ఇటీవలే విడుదలైన ఎన్టీఆర్ కథానాయకుడు డిజాస్టర్ టాక్ తెచ్చుకోవడంతో ప్రేక్షకుల్లో 'యాత్ర' పై అంచనాలు పెరుగుతున్నాయి. మహి.వి.రాఘవ దర్శకత్వం వహించిన ఈ చిత్రం ప్రేక్షకుల అంచనాలను ఎంతవరకు అందుకుంటుందో తెలియాలంటే విడుదల అయ్యేంత వరకు వేచి చూడాల్సిందే.