స్వర్గీయ నందమూరి తారక రామారావు బయోపిక్‌ని ఇటీవల గ్రాండ్‌గా ప్రారంభించారు. ఈ ప్రారంభోత్సవానికి తెలుగులో సినీ, రాజకీయ ప్రముఖులు పెద్ద ఎత్తున హాజరయ్యారు. ఇప్పుడు మరో దివంగత నేత వైఎస్‌ రాజశేఖర్‌ రెడ్డి జీవిత చరిత్రకు రంగం సిద్ధం చేస్తున్నారు. ఈ సినిమా ప్రారంభోత్సవాన్ని రేపు అనగా శనివారం నిర్వహించేందుకు గ్రాండ్‌గా ఏర్పాట్లు చేశారు. ఎన్టీఆర్‌ తర్వాత ఆ స్థాయిలో రాజకీయ నాయకుడిగా అభిమానం సంపాదించుకున్న వ్యక్తి రాజశేఖర్‌ రెడ్డి.

ఉమ్మడి ఆంధ్రప్రదేశ్‌ ముఖ్యమంత్రిగా ఆయన తన నడక, నడత, డిగ్నిటీతో కోట్ల మంది ప్రజల మనసుల్ని గెలుచుకున్నారు. అలాంటి మహానుభావుని జీవిత చరిత్రను తెరకెక్కించేందుకు గత కొంతకాలంగా గ్రౌండ్‌ వర్క్‌ జరుగుతోంది. ఇన్నాళ్లకు ఆ ప్రాజెక్ట్‌ పట్టాలెక్కతోంది. 'ఆనందోబ్రహ్మ' చిత్రాన్ని తెరకెక్కించిన మహి.వి.రాఘవ ఈ చిత్రాన్ని తెరకెక్కిస్తున్నారు. విజయ్‌ చిల్లా, శశి దేవీ రెడ్డి సంయుక్తంగా ఈ చిత్రాన్ని నిర్మిస్తున్నారు. రేపు ఈ సినిమా ప్రారంభోత్సవాన్ని అనౌన్స్‌ చేస్తూ, టైటిల్‌ లోగోను ప్రకటించారు.

'యాత్ర' అనే టైటిల్‌తో తెరకెక్కుతోన్న ఈ సినిమా టైటిల్‌ని ఓ పాదముద్రికతో డిజైన్‌ చేసి విడుదల చేశారు. 'కడప దాటి ప్రతీ గడపలోకీ వస్తున్నాను. మీతో కలిసి నడవాలనుంది. మీ గుండె చప్పుడు వినాలని ఉంది' అనే క్యాప్షన్‌ యాడ్‌ చేశారీ పోస్టర్‌పై. ఈ బయోపిక్‌లో వైఎస్సార్‌ పాత్రలో ప్రముఖ మలయాళ నటుడు ముమ్ముట్టి నటిస్తున్నారు.