లిప్‌లాక్స్‌ ఫార్ములాతో ఈ మధ్య వస్తున్న చిన్న సినిమాలు ఎలాంటి సెన్సేషన్‌ని అందుకుంటున్నాయో ప్రత్యేకంగా చెప్పనక్కర్లేదు. త్వరలో విడుదల కానున్న ఈ తరహా కాన్సెప్ట్‌ మూవీకి చిత్ర యూనిట్‌ చేస్తున్న పబ్లిసిటీ చూస్తుంటే ఆశ్చర్యమేస్తోంది. '24 కిస్సెస్‌' టైటిల్‌తో హెబ్బా పటేల్‌ హీరోయిన్‌గా, అరుణ్‌ అదిత్‌ హీరోగా ఓ చిత్రం తెరకెక్కిన సంగతి తెలిసిందే. 

డిశంబర్‌లో '24 కిస్సెస్‌' ప్రేక్షకుల ముందుకు రానుంది. ఈ సందర్భంగా చిత్ర యూనిట్‌ ప్రమోషన్స్‌ షురూ చేసింది. ఇందులో పెద్ద విశేషమేముంది అనుకుంటే పొరపాటే. ఓ టీవీ ఛానెల్‌లో ఈ సినిమాపై పబ్లిక్‌ ఒపీనియన్‌ పేరుతో ఓ ప్రోగ్రామే కండక్ట్‌ చేసేశారు తెలుసా? ఈ ప్రోగ్రాంలో భాగంగా సామాన్య జనంతో చిత్ర టీమ్‌ మమేకమై, వారి వారి అభిప్రాయాలను తెలుసుకుందన్న మాట. అయితే ఆ తెలుసుకోవడానికి కాస్త కాంట్రవర్సీ జత చేసి, ఇంకాస్త మసాలా కూడా దట్టించి ఆడియన్స్‌ని ఎట్రాక్ట్‌ చేసే ప్రయత్నం చేశారు. 

'మిణుగురులు' సినిమాతో అవార్డులు అందుకున్న అయోధ్యకుమార్‌ కృష్ణం శెట్టి దర్శకత్వంలో తెరకెక్కిన ఈ చిత్రంలో ఎలాంటి అభ్యంతరకర సన్నివేశాలు లేవనీ టైటిల్‌ '24 కిస్సెస్‌' అని ఉన్నా, ఇది క్లీన్‌ మూవీ అని చెబుతున్నారు కానీ, ప్రచార చిత్రాలు చూస్తుంటే అలా అనిపించడం లేదు సరికదా ఖచ్చితంగా యూత్‌ని ఎట్రాక్ట్‌ చేసే సినిమాగానే అనిపిస్తోంది. అందుకే ఓ వర్గం ప్రేక్షకుల నుండి ఈ సినిమాకి తీవ్ర వ్యతిరేకత వస్తోంది. 

ఇలాంటి సినిమాల వల్ల యూత్‌కి, సమాజానికి ఏం మెసేజ్‌ ఇస్తున్నారంటూ కొంచెం గట్టిగానే ప్రశ్నిస్తున్నారు ఆ వర్గం వారు. ఏది ఏమైతేనేం. సినిమాలో ఏం చూపించారనేది తెలియాలంటే విడుదల డేట్‌ వరకూ ఆగాల్సిందే. డిశంబర్‌ 21న '24 కిసెస్‌' ప్రేక్షకుల ముందుకు రానుంది.