'ఆంధ్రా పోరీ' సినిమాతో హీరోగా తెలుగు తెరకు పరిచయమయ్యాడు క్రియేటివ్‌ డైరెక్టర్‌ పూరీ జగన్నాధ్‌ తనయుడు ఆకాష్‌ పూరీ. తొలి సినిమాతో ఆకట్టుకోలేకపోయాడు. తర్వాత తండ్రి స్వీయదర్శకత్వంలో భారీ అంచనాల నడుమ తెరకెక్కిన 'మెహబూబా' కూడా నిరాశపరిచింది. కానీ నటుగా ఈ సినిమాతో మంచి మార్కులు వేయించుకున్నాడు ఆకాష్‌ పూరీ. బాల నటుడిగా పలు చిత్రాల్లో నటించిన అనుభవం ఉన్న ఆకాష్‌ తాజాగా మరో కొత్త ప్రాజెక్ట్‌ని టేకప్‌ చేశాడు.
ఈ ప్రాజెక్ట్‌కి కథ, స్క్రీన్‌ప్లే, నిర్మాణం అన్నీ పూరీనే. కానీ అనిల్‌ పాడూరిని దర్శకుడిగా పరిచయం చేస్తున్నాడు పూరీ. పూరీ కనెక్ట్స్‌ బ్యానర్‌లో పూరీ జగన్నాధ్‌, ఛార్మి ఈ సినిమాని నిర్మిస్తున్నారు. గతంలో కూడా పలు చిత్రాలకు దర్శకత్వం లేకుండా కథ, మాటలు అందించాడు పూరీ జగన్నాధ్‌. తమ్ముడు సాయిరామ్‌ శంకర్‌ సినిమాలకు ఈ విధమైన బాధ్యతలు నిర్వహించాడు పూరీ.
ఇప్పుడు తనయుడి కోసం కూడా అన్నీ తానై, దర్శకత్వం ఛాన్స్‌ వేరొకరికి ఇస్తున్నాడు. స్వీయ దర్శకత్వంలో ఆకాష్‌కి హిట్‌ ఇవ్వలేకపోయాడు. చూడాలి మరి ఈ సారైనా ఆకాష్‌ హిట్టు కొడతాడేమో. 'మెహబూబా'తో నేహాశెట్టిని హీరోయిన్‌గా పరిచయం చేసిన డేరింగ్‌ డైరెక్టర్‌ పూరీ ఇప్పుడు ఏ ముద్దుగుమ్మని దించుతాడో. ఈ సినిమాకి 'రొమాంటిక్‌' అనే యూత్‌ఫుల్‌ టైటిల్‌ని ఫిక్స్‌ చేశారు.
