తెలుగులో పలు చిత్రాలతో ఆకట్టుకున్న ముద్దుగుమ్మ ఆదాశర్మ కోలీవుడ్‌లో 'చార్లీ చాప్లిన్‌ 2' సినిమాతో అడుగుపెడుతోంది. గతంలో శక్తి చిదంబరం దర్శకత్వంలో తెరకెక్కిన 'చార్లీ చాప్లిన్‌' చిత్రానికి ఇది సీక్వెల్‌గా తెరకెక్కుతోంది. సీనియర్‌ నటుడు ప్రభు, ఇండియన్‌ మైఖేల్‌ జాక్సన్‌ ప్రభుదేవా ఈ సినిమాలో ప్రధాన పాత్రల్లో నటించారు. అప్పట్లో ఈ సినిమా ఘన విజయం సాధించింది. 

చార్లీ చాప్లిన్‌ అంటేనే స్వచ్చమైన కామెడీకి కేరాఫ్‌ అడ్రస్‌. ఆ టైటిల్‌తో తెరకెక్కిన ఈ చిత్రం కూడా అంతే స్వచ్ఛమైన హాస్యంతో రూపొంది, ఘన విజయం సాధించింది అప్పట్లో. మళ్లీ ఇన్నాళ్లకు ఈ చిత్రానికి సీక్వెల్‌ని రూపొందించారు. త్వరలోనే ఈ సినిమా షూటింగ్‌ పూర్తి కానుంది. 'చార్లీ చాప్లిన్‌' తెరకెక్కించిన దర్శకుడు శక్తి చిదంబరమే ఈ సీక్వెల్‌ని కూడా తెరకెక్కిస్తున్నారు. అప్పటి కాంబినేషన్‌ ప్రభు, ప్రభుదేవానే ప్రధాన పాత్రలు పోషిస్తున్నారు ఈ సినిమాలో. అయితే ఎంటర్‌టైన్‌మెంట్‌ మాత్రం డిఫరెంట్‌గా ఉండబోతోందట. 

సరికొత్త కామెడీతో పాటు డిఫరెంట్‌ యాక్షన్‌ టచ్‌ ఉండబోతోందట ఈ సీక్వెల్‌లో. ప్రేక్షకులు సినిమా చూస్తున్నంత సేపూ పొట్ట చెక్కలయ్యేలా నవ్వుకుంటూనే ఉంటారట. పూర్తి స్థాయిలో కామెడీ చిత్రాలకు ఇప్పుడు ఆదరణ పెరుగుతోంది. ఆ తరుణంలో సరికొత్త హాస్య కథా చిత్రంగా 'చార్లీ చాప్లిన్‌ 2'ని రూపొందిస్తున్నామనీ డైరెక్టర్‌ శక్తి చిదంబరం తెలిపారు. ఇకపోతే ఈ చిత్రంలో హీరోయిన్‌గా నటిస్తున్న ఆదాశర్మకు తొలి చిత్రానికే ప్రభుదేవాతో నటించే అదృష్టం దక్కినందుకు ఆనందంతో పొంగిపోతోంది. అలాగే తానింత వరకూ పోషించని సరికొత్త క్యారెక్టర్‌లో ఈ సినిమాలో కనిపిస్తాననీ చెబుతోంది. ఈ సినిమాలో మరో ముద్దుగుమ్మ నిక్కీ గల్రాని కూడా హీరోయిన్‌గా నటిస్తోంది.