ఐటెం సాంగ్స్‌ అంటే ఒకప్పుడు చిన్నతనంగా భావించేవారు. ముఖ్యంగా హీరోయిన్లు ఐటెం సాంగ్స్‌లో కనిపించడం అంటే కెరీర్‌ చివరి దశకు చేరుకున్నట్లే అనే నెగిటివ్‌ టాక్‌ ఉండేది. అయితే ఇప్పుడు ట్రెండ్‌ మారింది. ఐటెం గాళ్స్‌తో ఐటెం సాంగ్స్‌ కన్నా, మాస్త్‌ క్రేజ్‌ ఉన్న హీరోయిన్స్‌తో ఐటెం సాంగ్స్‌కే ఎక్కువ పాపులారిటీ దక్కుతోంది. అందుకే ఐటెం సాంగ్‌ అంటే హీరోయిన్లు కూడా ఎగిరి గంతేస్తున్నారు. కళ్లు మూసుకుని ఒప్పేసుకుంటున్నారు.
శ్రియ, తమన్నా, కాజల్‌, పూజాహెగ్దే.. ఇలా ఒక్కరేంటీ చాలా మందే ఐటెం సాంగ్స్‌లో తమ సత్తా చూపించేశారు. అయితే క్యూట్‌ బ్యూటీ అదాశర్మ మాత్రం ఐటెం సాంగ్‌కి నో అంటోందట. నిజానికి ఈ బ్యూటీకి ఏమంత ఇమేజ్‌ లేదిప్పుడు. 'హార్ట్‌ ఎటాక్‌' సినిమాతో తెరంగేట్రం చేసిన ఈ బ్యూటీ ఖాతాలో పెద్దగా చెప్పుకోదగ్గ సినిమాలు లేవు. ఏదో వేళ్ల మీద ల్కెపెట్టుకునేవి తప్ప. అయితే సోషల్‌ మీడియాలో అమ్మడికి బోలెడంత క్రేజ్‌ ఉందిలెండి.
క్రేజ్‌ ఉన్నప్పుడే కదా క్యాష్‌ చేసుకునేది. కానీ అదా ఎందుకో ఐటెం సాంగ్‌కి దూరంగా జరుగుతోంది. నాని హీరోగా లేటెస్ట్‌గా తెరకెక్కుతోన్న 'జెర్సీ' మూవీలో శ్రద్ధా శ్రీనాధ్‌ హీరోయిన్‌గా నటిస్తున్న సంగతి తెలిసిందే. ఈ సినిమాలో ఐటెం సాంగ్‌ కోసం అదాశర్మను సంప్రదించారంటూ ఓ వార్త హల్‌చల్‌ చేస్తోంది. అయితే ఇందులో ఎంత మాత్రమూ నిజం లేదనీ, 'జెర్సీ'లో తాను ఐటెం సాంగ్‌ చేయడం లేదనీ తాజాగా ఆదా తేల్చేసింది.
