'ఆర్‌ఆర్‌ఆర్‌' మొద‌టి షెడ్యూలు పూర్త‌యిపోయి, రెండో షెడ్యూలులోకి అడుపెట్టింది. ఈ చిత్రానికి సంబంధించిన షూటింగ్ శ‌ర‌వేగంగా సాగిపోతోంది. అయితే... ఇంత వ‌ర‌కూ క‌థానాయిక‌లెవ‌రన్న‌ది తేల్చ‌లేదు. ఈ సినిమాలో ముగ్గురు క‌థానాయిక‌లు ఉంటార‌ని చిత్ర‌బృంద‌మే ప్ర‌క‌టించింది. ర‌క‌ర‌కాల పేర్లు కూడా బ‌య‌ట‌కు వ‌చ్చాయి. కీర్తి సురేష్‌, ర‌ష్మిక, రాశీఖ‌న్నా.. ఇలా ర‌క‌ర‌కాల పేర్లు చెప్పుకున్నారు. వాటిపై ఇప్ప‌టి వ‌ర‌కూ క్లారిటీ లేదు. ఇప్పుడు అలియాభ‌ట్ పేరు కూడా గ‌ట్టిగానే వినిపిస్తోంది.
రామ్ చరణ్ ప‌క్క‌న కథానాయికగా అలియాని ఎంచుకున్నార‌ని మీడియాలో పెద్ద ఎత్తున ప్ర‌చారం మొద‌లైంది. అలియా గ‌నుక ఓకే అంటే... త‌న తొలి ద‌క్షిణాది చిత్రం ఇదే అవుతుంది. మ‌రి ఎన్టీఆర్ ప‌క్క‌న ఎవ‌రిని కథానాయికగా ఎంచుకుంటారో చూడాలి. అయితే క‌థానాయిక‌ల విష‌యంలో బ‌య‌ట ఇంత ప్ర‌చారం జ‌రుగుతున్నా - రాజమౌళి అండ్ టీమ్ ఎందుకో గోప్య‌త పాటిస్తోంది. త‌ర‌చూ ట్విట్ట‌ర్ల‌లో కొన్ని సందేహాల‌కు క్లారిటీ ఇచ్చే రాజమౌళి - ఈసారి నిశ్శ‌బ్దంగా ఉండ‌డం కూడా అంతుప‌ట్ట‌డం లేదు. ఒకేసారి ముగ్గురు పేర్ల‌నీ ప్ర‌క‌టించాల‌ని వేచి చూస్తోందేమో.
