బుల్లితెర మెగా రియాల్టీ షో బిగ్‌బాస్‌ సీజన్‌ 3 హోస్ట్‌ విషయంలో ఇంకా అనుమానాలు తీరలేదు. వెంకటేష్‌ హోస్ట్‌గా వ్యవహరించనున్నారని అంతా అనుకున్నారు. కానీ 'బిగ్‌బాస్‌ 2'తో నాని తెచ్చుకున్న బ్యాడ్‌ ఇమేజ్‌తో ఎందుకొచ్చిన గొడవలే అనుకున్నాడో ఏమో వెంకటేష్‌ సింపుల్‌గా నో చెప్పేశాడు. దాంతో మళ్లీ వ్యవహారం మొదటికొచ్చింది. హోస్ట్‌ వేట మొదలుపెట్టింది బిగ్‌బాస్‌ టీమ్‌. తాజాగా ఎన్టీఆర్‌ పేరు తెరపైకి వచ్చినట్లు తెలుస్తోంది.
ఎన్టీఆర్‌ హోస్టింగ్‌తో బిగ్‌బాస్‌ ఫస్ట్‌ సీజన్‌కి ఏ స్థాయిలో క్రేజ్‌ వచ్చిందో అందరికీ తెలిసిందే. అదే క్రేజ్‌ని ఈ సీజన్‌లో బిగ్‌బాస్‌ షోకి తీసుకురావాలని అందుకోసం ఎంతైనా ఖర్చు చేయడానికి, ఎంతగానైనా ప్రయత్నం చేయడానికి వెనుకాడడం లేదట. అందులో భాగంగానే ఎలాగోలా ఒప్పించి ఎన్టీఆర్‌ని ఈ షోకి తీసుకురావాలనుకుంటున్నారట. ఎన్టీఆర్‌ కూడా సుముఖంగా ఉన్నట్లే అని టాక్‌ వినిపిస్తోంది కానీ, ప్రస్తుతం ఎన్టీఆర్‌ 'ఆర్‌ఆర్‌ఆర్‌' మూవీతో బిజీగా ఉన్నాడు.
రాజమౌళి సినిమా అంటే ఆర్టిస్టులు ఇతరత్రా ప్రోగ్రామ్‌లు పెట్టుకోవడానికి అస్సలు కుదరదు. అందులోనూ ప్రెస్టీజియస్‌ మూవీ 'ఆర్‌ఆర్‌ఆర్‌'. అలాంటిది ఈ తరుణంలో 'బిగ్‌బాస్‌ 3'ని హ్యాండిల్‌ చేయడమంటే అంత ఆషామాషీ విషయం కాదు మరి. అయినా 'బిగ్‌బాస్‌'కి తన హోస్టింగ్‌తో వన్నె తెచ్చిన ఎన్టీఆర్‌, బుల్లితెర ప్రేక్షకుల కోసం ఏమైనా రిస్క్‌ చేస్తాడో ఏమో. ఏది ఏమైనా ఎన్టీఆర్‌ వస్తే, బిగ్‌బాస్‌కి గ్లామర్‌తో పాటు, కొత్త ఉత్సాహం రావడం పక్కా. అయితే చూడాలి మరి.
