'సైరా;ముగిసిన వెంట‌నే చిరంజీవి 152వ సినిమా కూడా ప‌ట్టాలెక్కేయ‌బోతోంది. కొర‌టాల శివ ద‌ర్శ‌క‌త్వం వ‌హించే ఈ చిత్రానికి రామ్ చ‌ర‌ణ్ నిర్మాత‌గా వ్య‌వ‌హ‌రిస్తాడు. ఇప్ప‌టికే స్క్రిప్టు ప‌నులు పూర్త‌య్యాయి. ఈ సినిమాలో చిరంజీవి ద్విపాత్రాభిన‌యం చేస్తున్న సంగ‌తి తెలిసిందే.ఈ రెండు పాత్ర‌లేమిటి? ఎలా ఉంటాయి? అనే విష‌యాలు ఇప్పుడు బ‌య‌ట‌కు వ‌చ్చేశాయి. చిరంజీవి ఓ పాత్ర‌లో ఎన్.ఆర్‌.ఐగా క‌నిపించ‌బోతున్నాడు. విదేశాల్లో కోట్లు సంపాదించి, స్వ‌దేశంలో అడుగ‌పెట్టిన వ్యాపార వేత్త చిరంజీవి.

ఇక్క‌డ మ‌రో చిరంజీవి రైతుగా ద‌ర్శ‌న‌మివ్వ‌బోతున్నాడు. ఈ రెండు పాత్ర‌ల మ‌ధ్య స్ప‌ష్ట‌మైన వైవిధ్యం చూపించ‌డానికి కొర‌టాల ప్ర‌య‌త్నిస్తున్నాడు. రైతు పాత్ర‌కీ, ఎన్ఆర్.ఐకీ వ‌య‌సులో చాలా తేడా చూపించ‌బోతున్నాడ‌ట‌. అంటే.. చిరు గెట‌ప్ కూడా పూర్తిగా మార‌బోతోంద‌న్న‌మాట‌. ఆ గెట‌ప్ కోసం కొన్ని ఫొటో షూట్‌లూ చేయాల్సివ‌స్తుంద‌ని స‌మాచారం. ఎన్‌.ఆర్‌.ఐ పాత్ర స‌ర‌దా స‌ర‌దాగా ఉంటే, రైతు పాత్ర మాత్రం భావోద్వేగాల‌తో సాగుతుంద‌ని, సెంటిమెంట్ పండిస్తుంద‌ని తెలుస్తోంది. మొత్తానికి చిరు అభిమానుల‌కు డ‌బుల్ వినోదం గ్యారెంటీ అన్న‌మాట‌.