రాజశేఖర్‌ - జీవిత దంపతులు మెగాస్టార్‌ చిరంజీవిని కలిశారు. చిరుతో చాలా సేపు ముచ్చటించారు. రాజశేఖర్‌ హీరోగా తెరకెక్కుతోన్న 'పీఎస్‌వీ గరుడవేగ' చిత్ర విశేషాలను చిరంజీవితో పంచుకున్నారు. సినిమా తప్పకుండా చూడాలని చిరంజీవిని కోరారు రాజశేఖర్‌ దంపతులు. తప్పకుండా చూస్తాననీ చిరంజీవి వారికి హామీ ఇచ్చారు. సినిమా మంచి విజయం సాధించాలని ఆల్‌ ది బెస్ట్‌ చెప్పారు చిరంజీవి, రాజశేఖర్‌కి. ఈ సినిమా ఈ రోజే ప్రేక్షకుల ముందుకు వస్తోంది. సినిమా ట్రైలర్‌ అంచనాల్ని భారీగా పెంచేసింది. హాలీవుడ్‌ స్థాయి క్వాలిటీని ట్రైలర్‌లో చూపించారు డైరెక్టర్‌. ఎన్‌.ఐ.ఏ అధికారి పాత్రలో రాజశేఖర్‌ నటిస్తున్నారు ఈ చిత్రంలో. దేశ రక్షణ నిమిత్తం ఎన్‌ఐఏ అధికారులు తమ కార్యకలాపాలను చాలా గోప్యంగా ఉంచుతారు. ఫ్యామిలీకి కూడా ఏ విషయాలూ రివీల్‌ చేయరు. అలాంటి పవర్‌ఫుల్‌ ఆఫీసర్‌ పాత్రలో రాజశేఖర్‌ నటిస్తున్నారు. యాక్షన్‌ సీన్స్‌ చాలా బాగా తెరకెక్కించారు. హాలీవుడ్‌ రేంజ్‌లో యాక్షన్‌ ఘట్టాలున్నాయి 'గరుడవేగ'లో. జాతీయ అవార్డు గ్రహీత అయిన ప్రవీణ్‌ సత్తారు ఈ సినిమాని తెరకెక్కించారు. బాలీవుడ్‌ ఐటెం బాంబ్‌ సన్నీలియోన్‌ ఈ సినిమాలో స్పెషల్‌ సాంగ్‌ చేసింది. 'డియో డియో..' అంటూ సాగే ఆ పాట సినిమాకి స్పెషల్‌ అట్రాక్షన్‌. పూజా కుమార్‌ హీరోయిన్‌గా నటించింది. యాక్షన్‌ హీరోగా పాపులర్‌ అయిన రాజశేఖర్‌కి చాలా కాలంగా సరైన హిట్‌ లేదు. ఈ సినిమాతో రాజశేఖర్‌ ఈజ్‌ బ్యాక్‌ అయ్యేలానే అనిపిస్తోంది. ఈ సినిమా విడుదలవుతోన్న ధియేటర్స్‌ వద్ద రాజశేఖర్‌ అభిమానుల కోలాహలం సందడిగా మారింది. లాంగ్‌ గ్యాప్‌ తర్వాత తమ అభిమాన హీరో చేస్తున్న యాక్షన్‌ మూవీ కోసం అభిమానులు ఆరాటంగా ఎదురు చూసిన రోజు రానే వచ్చింది. చూడాలి మరి రాజశేఖర్‌కి 'గరుడవేగ' ఏ రిజల్ట్‌నిస్తుందో!