ప్రముఖ కమెడియన్, యాంకర్ అయిన కపిల్ శర్మ తన కామెడీ నైట్స్ విత్ కపిల్ శర్మ షోతో ఎంతటి పాపులారిటీ సంపాదించాడో చెప్పలేం. అలాగే ఆ ఫాలోయింగ్ తో ఆయన సినిమాల్లో కూడా అడుగుపెట్టేసాడు.
అయితే కొన్ని అనివార్య కారణాల వల్ల కపిల్ శర్మ నిర్వహిస్తున్న షోని సోనీ టీవీ వారు నిలిపివేయడం జరిగింది. కపిల్ శర్మ తన కో-కమెడియన్స్ పట్ల దురుసుగా ప్రవర్తించడమే దీనికి కారణమంటూ పుకార్లు షికారు చేశాయి. ఇవ్వన్ని పక్కకి పెడితే ఆయన నిర్వహిస్తున్న షో ఆగిపోవడం పెనుసంచలనమే అయింది.
ఇదిలావుండగా రెండు రోజుల క్రితమే ఆయన మళ్ళీ ఒక కామెడీ షోకి ప్లాన్ చేసినట్టు ఆ షోని సోనీ వారే ప్రసారం చేయబోతున్నట్టు ప్రకటన రావడం, ఆ టీజర్ కూడా బయటకి వచ్చింది.
ఇక ప్రస్తుతానికి ఆ షోకి ఫ్యామిలీ విత్ కపిల్ శర్మ అని అనుకుంటున్నట్టుగా యూనిట్ వర్గాల సమాచారం. మొత్తానికి కపిల్ శర్మ మళ్ళీ తనదైన శైలిలో కామెడీని పండించబోతున్నాడు అన్నది నిర్వివాదాంశం.
