నాగార్జున హీరోగా వచ్చిన 'మన్మధుడు' సినిమా కమర్షియల్‌గా బిగ్గెస్ట్‌ హిట్‌ అందుకున్న సంగతి తెలిసిందే. ఇన్నాళ్ల తర్వాత ఆ సినిమాకి సీక్వెల్‌ రూపొందుతోంది. నాగార్జునే హీరోగా నటిస్తున్నాడు. హీరోయిన్‌గా అప్పుడు సోనాలీ బింద్రే నటిస్తే, ఇప్పుడు ఆ ప్లేస్‌ని రకుల్‌ ప్రీత్‌సింగ్‌ ఆక్యుపై చేసింది. తాజాగా ఈ సినిమా లాంఛనంగా ప్రారంభమైంది. యంగ్‌ హీరో కమ్‌ డైరెక్టర్‌ రాహుల్‌ రవీంద్రన్‌ ఈ సినిమాకి దర్శత్వం వహిస్తున్నాడు.
ఆనంది ఆర్ట్‌ క్రియేషన్స్‌ బ్యానర్‌తో కలిసి మనం ఎంటర్‌ప్రైజెస్‌ బ్యానర్‌లో నాగార్జున ఈ సినిమాకి నిర్మాణ భాగస్వామ్యం వహిస్తున్నారు. కాగా గతంలో వచ్చిన 'మన్మధుడు' సినిమాలోని పంచ్‌ డైలాగులు యూత్‌ని ఎంతగా ఉర్రూతలూగించాయో ప్రత్యేకంగా చెప్పక్కర్లేదు. అప్పుడు యంగేజ్‌లో నాగార్జున తన క్లాస్‌ హ్యాండ్‌సమ్‌ లుక్స్‌తో అమ్మాయిల మనసుల్ని రొమాంటిక్‌గా దోచేశాడు. ఇప్పుడు కూడా ఏమంత తక్కువ కాదంటున్నాడు.
ఇదిలా ఉంటే, 'మన్మధుడు'లోలాగానే 'మన్మధుడు 2' కోసం కూడా ఓ ఫ్లాష్‌ బ్యాక్‌ ఎపిసోడ్‌ ఉందట. అయితే ఈ ఫ్లాష్‌ బ్యాక్‌లో నాగార్జునను మాస్‌ లుక్‌లో చూపించబోతున్నాడట డైరెక్టర్‌ రాహుల్‌ రవీంద్రన్‌. ఆ ఫ్లాష్‌ బ్యాక్‌ ఎపిసోడ్‌లో కామెడీ మరింత నవ్వులు పూయించేలా ఉంటుందని అత్యంత విశ్వసనీయ వర్గాల సమాచారమ్‌. మొత్తానికి 'మన్మధుడు 2' అంతకు మించిన ఫన్‌ అండ్‌ ఫ్రస్ట్రేషనే అవుతుందని అంటున్నారు. చూడాలి మరి.
