గ‌బ్బ‌ర్ సింగ్‌లో అంత్యాక్ష‌రి ఎపిసోడ్ ఎంత బాగా క్లిక్ అయ్యిందో అంద‌రికీ తెలిసిందే. ఆ ఎపిసోడ్‌లో న‌టించిన‌వాళ్లంద‌రీ ఆ త‌ర‌వాత మంచి అవ‌కాశాలు వ‌చ్చాయి. వాళ్ల‌లో ఆంజ‌నేయులు ఒక‌డు. `రోజ్ రోజ్ రోజ్ రోజ్ రోజాపువ్వా` అంటూ అచ్చం రాజ‌శేఖ‌ర్‌లా న‌వ్వించిన న‌టుడు ఆంజ‌నేయులు. గ‌బ్బ‌ర్ సింగ్ త‌ర‌వాత.. చాలా సినిమాల్లో న‌టించాడు. ఇప్పుడు ఈ నటుడే రోడ్డు ప్ర‌మాదంలో గాయ‌ప‌డ్డాడు.
ఆదివారం రాత్రి హైద‌రాబాద్‌లో త‌న స‌తీమ‌ణితో స‌హా బైకు మీద వ‌స్తుండ‌గా వెనుక నుంచి వ‌స్తున్న వాహ‌నం ఆంజ‌నేయుల్ని ఢీ కొట్టింది. దాంతో... ఆంజ‌నేయులు, అత‌ని భార్య గాయాల పాలయ్యారు. ప్ర‌స్తుతం ఆర్థికంగా చాలా ఇబ్బందుల‌లో ఉన్నాడు ఆంజ‌నేయులు. దానికి తోడు ఈ రోడ్డు ప్ర‌మాదం కృంగ‌దీస్తోంది. గాయాల వ‌ల్ల షూటింగుల‌కు కూడా వెళ్ల‌లేని ప‌రిస్థితులో ఉన్నానని ఆంజ‌నేయులు వాపోతున్నాడు. ఆంజ‌నేయులు ఫిర్యాదు మేర‌కు జూబ్లీహిల్స్ పోలీసులు కేసు న‌మోదు చేసి ద‌ర్యాప్తు చేస్తున్నారు.
