మెగాస్టార్‌ చిరంజీవి వాయిస్‌ ఓవర్‌ 'గుంటూరోడు' సినిమాకి చాలా పెద్ద ప్లస్‌ పాయింట్‌. ఈ విషయాన్ని ప్రకటిస్తూ మనోజ్‌ ట్విట్టర్‌లో పోస్ట్‌ చేసిన మెగా - గుంటూరోడు ఫొటో పెద్ద సెన్సేషన్‌ అయ్యిందని నిస్సందేహంగా చెప్పవచ్చు. సినీ పరిశ్రమలో ఓ హీరో, ఇంకో హీరో సినిమాకి ఏదో ఒకరకంగా సహకరించడం అనేది ఇటీవలి కాలంలో ఎక్కువగా చూస్తున్నాం. 'మర్యాదరామన్న' సినిమా కోసం రవితేజ వాయిస్‌ ఓవర్‌ ఇవ్వడం, 'జల్సా' సినిమాకి మహేష్‌ వాయిస్‌ ఓవర్‌ అందించడం ఆయా హీరోల అభిమానుల మధ్య సఖ్యతను పెంచాయి. అయితే ఆశించిన స్థాయిలో ఆ ట్రెండ్‌ వేగం పుంజుకోలేదు. ఇప్పుడు మాత్రం ఎక్కువగానే కనిపిస్తోంది ఒకరి సినిమాలకు ఒకరు సహకరించుకోవడం అనేది. తద్వారా ఏ సినిమా అయినా మార్కెట్‌ని పెంచుకోడానికి వీలువుతుంది. ముందుగా 'గుంటూరోడు' సినిమాకి వాయిస్‌ ఓవర్‌ ఇవ్వడం కోసం చరణ్‌ని అడుగుదామనుకున్నాడట మనోజ్‌. అనుకోకుండా చిరంజీవి లైన్‌లోకి వచ్చారట. చిరంజీవి ఇప్పటికే పలు సినిమాలకు వాయిస్‌ ఇచ్చారు గనుక, చరణ్‌ వాయిస్‌ ఇచ్చి ఉంటే 'గుంటూరోడు'కి ఇంకా స్పెషల్‌ అయ్యేది. ఈ మెగా - మంచు బంధం 'గుంటూరోడు' సినిమాకి భారీ ఓపెనింగ్స్‌ తెస్తాయని అంచనా వేస్తున్నారు టాలీవుడ్‌లో. ఏమవుతుందో చూడాలిక.