'ఎంతో మంచి అత్తమ్మను భయపెట్టిన కోడలు' ఏంటీ క్యాప్షన్‌ అనుకుంటున్నారా? తాజాగా మెగాస్టార్‌ చిరంజీవి ఇంట్లో హాలోవీన్‌ పార్టీ సందడిగా చేసుకున్నారు. చిరంజీవితో సహా మెగాస్టార్‌ కుటుంబ సభ్యులంతా ముఖానికి రకరకాల రంగులు, హారర్‌ కాస్ట్యూమ్స్‌ ధరించి, భయంకరంగా ముస్తాబయ్యారు. 

ఈ వేడుకకు సంబంధించిన ఫోటోలు నెట్టింట్లో సందడి చేస్తున్నాయి. ఎప్పుడూ ప్లజెంట్‌గా కనిపించే మెగా కుటుంబం ఒక్కసారి ఇలా హారర్‌ లుక్స్‌తో కనిపించేసరికి ఫ్యాన్స్‌ షాక్‌ అయ్యారు. ఆ తర్వాత పండగ చేసుకున్నారు. చిరంజీవితో పాటు ఆయన కూతుళ్లు సుస్మిత, శ్రీజ, అల్లుళ్లు, కోడలు ఉపాసన, వరుణ్‌తేజ్‌, సాయి థరమ్‌తేజ్‌, నిహారిక, అల్లు అర్జున్‌, స్నేహారెడ్డి తదితరులు ఈ ఫోటోల్లో కనిపిస్తున్నారు. అయితే ఈ ఫోటోలో అందరూ డిఫరెంట్‌ గెటప్స్‌లో కనిపిస్తున్నారు. 

కానీ రామ్‌చరణ్‌ మాత్రం అయ్యప్ప స్వామి దీక్షలో ఉన్నట్లున్నారు. బ్లాక్‌ కలర్‌ సాదా దుస్తుల్లో కనిపిస్తున్నారు. అత్తమ్మ సురేఖను కోడలు ఉపాసన భయపెడుతున్నట్లుగా ఉన్న ఫోటో ఉపాసన తన ఇన్‌స్టాగ్రామ్‌లో పోస్ట్‌ చేసింది. ఈ ఫోటోకే ఉపాసన పైన చెప్పిన క్యాప్షన్‌ని యాడ్‌ చేసింది. ఇలా మెగా కుటుంబంలో హాలీవీన్‌ పార్టీతో జబర్దస్త్‌ సందడి నెలకొంది. అప్పుడప్పుడూ మెగా కుటుంబంలో ఇలాంటి స్పెషల్‌ పార్టీలు జరుగుతూంటాయి. ఆ ఫోటోలు బయటికి వచ్చాక ఫ్యాన్స్‌ చూసి మస్త్‌ పండగ చేసుకుంటుంటారు. 

ప్రస్తుతం మెగాస్టార్‌ చిరంజీవి 'సైరా నరసింహారెడ్డి' సినిమాతో బిజీగా ఉన్నారు. అలాగే రామ్‌చరణ్‌ బోయపాటి సినిమా షూటింగ్‌లో బిజీగా ఉన్నారు. దాదాపు చివరి దశకు చేరుకున్న ఈ సినిమాకి 'వినయ విధేయ రామ' అనే టైటిల్‌ని పరిశీలిస్తున్నారు.