ర‌వితేజ‌కు ఎప్ప‌టి నుంచో మెగాఫోన్ ప‌ట్టాల‌ని కోరిక‌గా ఉంది. ఎందుకంటే... త‌ను స‌హాయ ద‌ర్శ‌కుడిగా ప‌రిశ్ర‌మ‌లో అడుగుపెట్టాడు. అనుకోకుండా హీరో అయిపోయి..స్టార్‌గా మారిపోయాడు. దాంతో ద‌ర్శ‌క‌త్వం అనే ఆలోచ‌న ప‌క్క‌న పెట్టాల్సివ‌చ్చింది. అయితే మ‌న‌సులో మాత్రం డైరెక్ట‌ర్ కుర్చీలో కూర్చోవాల‌ని ఆశ‌. `నేను త‌ప్ప‌కుండా సినిమా తీస్తా. అయితే అందులో మాత్రం నేను హీరోగా న‌టించ‌ను` అని చాలాసార్లు చెప్పాడు ర‌వితేజ‌.

ఇప్పుడు ఆమాట నిజం చేసుకోబోతున్న‌ట్టు తెలుస్తోంది. ప్ర‌ముఖ క‌థానాయ‌కుడు కళ్యాణ్ రామ్‌కి ర‌వితేజ ఓ క‌థ చెప్పాడ‌ట‌. అది కళ్యాణ్ రామ్‌కి బాగా న‌చ్చింద‌ని, ఎన్టీఆర్ ఆర్ట్స్‌లో ఈ సినిమాని త్వ‌ర‌లో రూపొందించేందుకు స‌న్నాహాలు చేస్తున్నార‌ని తెలుస్తోంది. అయితే ప్ర‌స్తుతానికి ర‌వితేజ చేతిలో చాలా సినిమాలున్నాయి. కళ్యాణ్ రామ్ కూడా బిజీగానే ఉన్నాడు. వీరిద్ద‌రికీ ఖాళీ దొరికిన‌ప్పుడే ఈ ప్రాజెక్టు ప‌ట్టాలెక్కుతుంది. అంత వ‌ర‌కూ ఈ క్రేజీ కాంబో గురించి ఎదురు చూడాల్సిందే.