విశ్వనటుడు కమల్‌హాసన్‌ ప్రెస్టీజియస్‌ ప్రాజెక్ట్‌ 'ఇండియన్‌ 2' షూటింగ్‌ ఇదిగో స్టార్ట్‌ అవుతోంది. అదిగో స్టార్ట్‌ అవుతోంది అంటూ వార్తలు వెలువడిన దర్మిలా ఎట్టకేలకు ఇటీవల ఈ సినిమా పట్టాలెక్కింది. అయితే, అనుకున్న టైంకి షూటింగ్‌ స్టార్ట్‌ కాని కారణంగా, ప్రాజెక్ట్‌కి మొదట్లో సైన్‌ చేసిన చాలామంది ఆర్టిస్టులు ఒక్కొక్కరుగా ఈ సినిమా నుండి తప్పుకుంటున్నారన్న వార్తలు హల్‌చల్‌ చేశాయి.
మొన్న కాజల్‌ విషయంలో ఇలాంటి వార్తే వస్తే, ఏది ఏమైనా ఈ సినిమా నుండి తప్పుకునేది లేదని కాజల్‌ ఖరాఖండిగా చెప్పేసింది. తాజాగా ఐశ్వర్యా రాజేష్‌ ఈ సినిమా నుండి తప్పుకుందంటూ వార్తలు వినిపిస్తున్నాయి. అయితే, ఐశ్వర్యా ఇప్పుడు కాదు, ఎప్పుడో ఈ సినిమా నుండి తప్పుకుందట. న్యూస్‌ లేట్‌గా బయటికి వచ్చిందంతే. ఐశ్వర్యా రాజేష్‌ తమిళంలో స్టార్‌ హీరోయిన్‌గా వరుస సినిమాల్లో నటిస్తోంది. తెలుగులో లేటెస్ట్‌గా 'కౌసల్యా కృష్ణమూర్తి' సినిమాతో ప్రేక్షకుల ముందుకొచ్చింది. త్వరలో విజయ్‌ దేవరకొండ సినిమాతో రానుంది.
ఇంత బిజీ షెడ్యూల్‌లో 'ఇండియన్‌ 2' కోసం డేట్స్‌ అడ్జస్ట్‌ చేయలేకపోయిందట. అందుకే, సినిమా నుండి వినమ్రంగా తప్పుకుందట. ఇదిలా ఉంటే, 'ఇండియన్‌ 2'లో రకుల్‌ ప్రీత్‌ సింగ్‌ కూడా ఓ ఇంపార్టెంట్‌ రోల్‌ పోషిస్తున్న సంగతి తెలిసిందే. ఈ ఛాన్స్‌ రకుల్‌కి ఎలా వచ్చిందంటే, ఐశ్వర్యా రాజేష్‌ హ్యాండివ్వడం వల్లనే అని తెలుస్తోంది. కారణమేదైతేనేం, రకుల్‌ ప్రీత్‌ అయితే, 'ఇండియన్‌ 2'కి ఫిక్సయ్యింది. ఆల్రెడీ షూటింగ్‌లో కూడా జాయిన్‌ అయ్యింది. నో డౌట్‌.. ఇది ఆమెకు బంపర్‌ ఆఫర్‌ అంతే.
