కార్తి హీరోగా తెరకెక్కుతోన్న చిత్రం 'ఖాకి'. త్వరలోనే విడుదలకు సిద్ధంగా ఉంది. వినోద్‌ దర్శకత్వం వహించారు ఈ సినిమాకి .ఇంతవరకూ చాలా పోలీస్‌ స్టోరీలు తెరకెక్కాయి. వాటన్నింటికీ అత్యంత భిన్నంగా ఈ సినిమా తెరకెక్కుతోంది. కార్తి పోలీస్‌ ఆఫీసర్‌ పాత్రలో చాలా కొత్తగా కనిపిస్తున్నాడు. పక్కింటి అబ్బాయిలా కాదు, ఇంట్లో అబ్బాయిలానే కనిపించే కార్తీ తొలిసారిగా పోలీస్‌ గెటప్‌లో నటిస్తున్న చిత్రమిది. పాత్ర చాలా పవర్‌ ఫుల్‌గా ఉంటుందట. శాంతి భద్రతల విషయంలో కీలక పాత్ర పోషించే పోలీసుల జీవితాల్ని వారి జీవితంలోని భిన్న యాంగిల్స్‌నీ కళ్లకు కట్టినట్లుగా చూపించారట ఈ సినిమాలో. 

కార్తీకి తెలుగులోనూ మంచి మార్కుట్‌ ఉంది. 'ఊపిరి' సినిమాతో డైరెక్ట్‌ తెలుగు సినిమా చేసిన తమిళ యంగ్‌ హీరో కార్తి. తమిళ హీరో అయినా కానీ తెలుగు హీరోలానే కార్తీని అభిమానిస్తుంటారు తెలుగు ప్రేక్షకులు. నేటి తరం హీరోల్లో ఎవరికీ లేనంత ఫాలోయింగ్‌ తెలుగులో కార్తీకి ఉందని చెప్పొచ్చు. 'ఊపిరి' సినిమాతోనే అది ప్రూవ్‌ అయ్యింది. కార్తీ నటించిన 'నా పేరు శివ' తదితర సినిమాలు తెలుగులోనూ డబ్‌ అయ్యి మంచి విజయం అందుకున్నాయి. భావోద్వేగాల్ని అత్యంత సులువుగా పండించగల నటుడు కార్తీ. ఈ సినిమాలో పోలీసాఫీసర్‌గా తనలోని డిఫరెంట్‌ యాంగిల్‌ని చూస్తారంటున్నాడు.  

ఇంతకు ముందు వచ్చిన 'కాష్మోరా' సినిమా కార్తికి ఆశించిన ఫలితాన్నివ్వలేదు. సో ఈ సినిమాపై అంచనాలున్నాయి. ముద్దుగుమ్మ రకుల్‌ ప్రీత్‌ సింగ్‌ హీరోయిన్‌గా నటిస్తోంది. తొలిసారిగా రకుల్‌, కార్తీతో జత కడుతోంది. ఉమేష్‌ గుప్తా, సుభాష్‌ గుప్తా నిర్మాతలుగా పని చేసిన ఈ సినిమా ఈ నెల 17న ప్రేక్షకుల ముందుకు రానుంది.