'ఆర్‌ఎక్స్‌100' సినిమాతో హీరోగా సంచలన విజయం అందుకున్నాడు కార్తికేయ. తర్వాత 'హిప్పీ' సినిమాలో హీరోగా నటిస్తున్నాడు. కాగా తాజా సమాచారమ్‌ ప్రకారం కార్తికేయ విలన్‌ అవతారమెత్తబోతున్నాడనీ తెలుస్తోంది. నాని హీరోగా నటిస్తున్న విక్రమ్‌ కుమార్‌ సినిమా కోసం కార్తికేయ విలన్‌గా మారనున్నాడని ప్రచారం జరుగుతోంది. ఈ సినిమాలో విలన్‌గా నటించేందుకు కార్తికేయ ఒప్పేసుకున్నాడనే టాక్‌ కూడా బలంగా వినిపిస్తోంది.
అయితే ఈ జనరేషన్‌ హీరోలు కేవలం ఒకే పాత్రకు పరిమితమైపోకుండా, విభిన్న పాత్రలను ఎంచుకుంటూ నటనలో విభిన్న యాంగిల్స్‌ని బయటికి తీసుకొస్తున్నారు. ఆ మాటకొస్తే మెగాస్టార్‌ చిరంజీవి కూడా విలన్‌ పాత్రల నుండే హీరోగా ఎదిగారు. శ్రీకాంత్‌, మోహన్‌బాబు సంగతి చెప్పనక్కర్లేదు. ఇక యంగ్‌ జనరేషన్‌ని తీసుకుంటే, ఆది పినిశెట్టి, తారకరత్న, నవీన్‌చంద్ర, ఇలా తదితర యంగ్‌ హీరోలు విలన్స్‌గా సత్తా చాటారు, చాటుతున్నారు. అంతెందుకు ఎన్టీఆర్‌ కూడా 'జై లవకుశ'లో విలన్‌గా నటించి మెప్పించాడు.
గోపీచంద్‌ కూడా విలన్‌గా మెప్పించి హీరోగా ఎదిగాడు. హీరో అయ్యాక 'గౌతమ్‌ నందా' కోసం మళ్లీ విలన్‌ అవతారమెత్తిన సంగతి తెలిసిందే. తాజాగా మెగా హీరో వరుణ్‌తేజ్‌ హరీష్‌ శంకర్‌ సినిమాలో విలన్‌గా నటించేందుకు సిద్ధంగా ఉన్నాడు. ఇలా చెప్పుకుంటూ పోతే హీరోయిజంతో పాటు, విలనిజం పండించేందుకు కూడా మన హీరోలు ఇంట్రెస్ట్‌ చూపిస్తున్నారు. అదే కోవలో నాని కోసం కార్తికేయ విలన్‌గా మారనున్నాడనీ తెలుస్తోంది. అయితే ఈ వార్తలో నిజమెంతో తెలియాలంటే అఫీషియల్‌ క్లారిటీ వచ్చేంతవరకూ ఆగాల్సిందే.
