సౌత్‌లో మహానటిగా కీర్తి ప్రతిష్టలు తెచ్చుకుని, ఇటీవల నేషనల్‌ అవార్డు అందుకున్న ముద్దుగుమ్మ కీర్తిసురేష్‌ త్వరలో బాలీవుడ్‌ ప్రేక్షకుల్ని సైతం మెస్మరైజ్‌ చేయనున్న సంగతి తెలిసిందే. అజయ్‌ దేవగణ్‌ - కీర్తిసురేష్‌ కాంబినేషన్‌లో అక్కడ ఓ సినిమా తెరకెక్కుతోంది. ఫుట్‌బాల్‌ నేపథ్యంలో తెరకెక్కుతోన్న ఈ సినిమాకి 'మైదాన్‌' అనే టైటిల్‌ని ఫిక్స్‌ చేశారు. లేటెస్ట్‌గా స్టార్ట్‌ అయిన ఈ సినిమాని అమిత్‌ రవీంద్రనాధ్‌ శర్మ తెరకెక్కిస్తున్నారు.
జీ స్టూడియోస్‌తో కలిసి ప్రముఖ నిర్మాత బోనీ కపూర్‌ ఈ సినిమాని నిర్మిస్తున్నారు. స్పోర్ట్స్‌ నేపథ్యంలో తెరకెక్కే సినిమాలకు బాలీవుడ్‌లో మంచి క్రేజ్‌ ఉంది. గతంలో ఈ నేపథ్యంలో వచ్చిన చాలా చిత్రాలు సక్సెస్‌ అందుకున్నాయి. ఒకవేళ ఈ సినిమా కూడా హిట్‌ అయితే, కీర్తి సురేష్‌కి ఇక తిరుగే ఉండదు. తొలి సినిమాకే ఇంత మంచి కాన్సెప్ట్‌లో నటించే ఛాన్స్‌ రావడం కీర్తి సురేష్‌ అదృష్టమే.
అదృష్టం ఫలించి, కీర్తి అక్కడ కూడా సత్తా చాటిందంటే, 'మహానటి' పేరును సార్థకం చేసుకున్నట్లే అవుతుంది. ఎంతైనా 'మహానటి' కదా.. అత్యంత ప్రాధాన్యతతో కూడిన పాత్రనే ఆమె కోసం డిజైన్‌ చేశారట. 2020లో ఈ సినిమా విడుదల కానుంది. మరోవైపు కీర్తి సురేష్‌ తెలుగు, తమిళ భాషల్లోనూ వరుస చిత్రాలతో బిజీగా ఉంది. తెలుగులో హీరోయిన్‌ సెంట్రిక్‌ మూవీ ఒకటి ఇటీవలే స్టార్ట్‌ అయ్యింది.
