ఒక్కోసారి లేడీ ఓరియెంటెడ్‌ టైటిల్స్‌తో వచ్చిన సినిమాలు సూపర్‌ హిట్‌ అవుతుంటాయి. గతంలో విక్టరీ వెంకటేష్‌ హీరోగా తెరకెక్కిన 'లక్ష్మీ', 'తులసి' తదితర చిత్రాలు అలాగే విజయవంతమయ్యాయి. తాజాగా ఇదే జోనర్‌ని మాస్‌ రాజా రవితేజ కూడా అనుసరించాలనుకుంటున్నాడట. ప్రస్తుతం మాస్‌రాజా రవితేజ 'డిస్కోరాజా' సినిమాలో నటిస్తున్న సంగతి తెలిసిందే. వి.ఐ.ఆనంద్‌ ఈ సినిమాకి దర్శకుడు. పాయల్‌ రాజ్‌పుత్‌ హీరోయిన్‌గా నటిస్తోంది.
కాగా రవితేజ తదుపరి చిత్రం కూడా లైన్‌లో ఉన్న సంగతి తెలిసిందే. తమిళంలో విజయ్‌ నటించిన ఓ సూపర్‌ హిట్‌ మూవీ రీమేక్‌లో రవితేజ నటిస్తున్నాడంటూ వార్తలు వినిపిస్తున్నాయి. దాదాపు ఈ ప్రాజెక్ట్‌ కన్‌ఫామ్‌ అయినట్లే. సంతోష్‌ శ్రీనివాస్‌ ఈ సినిమాని తెరకెక్కించనున్నాడు. కాజల్‌ అగర్వాల్‌, కేథరీన్‌లు హీరోయిన్లుగా నటించనున్నారు. త్వరలోనే ఈ సినిమా సెట్స్‌ పైకి వెళ్లనుంది.
ఇదిలా ఉంటే ఈ సినిమాకి 'కనకదుర్గ' అనే టైటిల్‌ని పరిశీలిస్తున్నారనేది తాజా వినికిడి. లేడీ ఓరియెంటెడ్‌ టైటిల్‌ని రవితేజ ఇంతకు ముందెన్నడూ ట్రై చేయలేదు. ప్రస్తుతం వరుస ఫెయిల్యూర్స్‌లో ఉన్న రవితేజకు ప్రచారంలో ఉన్న ఈ టైటిల్‌ వర్కవుటవుతుందో లేదో చూడాలంటే ఇంకా చాలా టైమే వెయిట్‌ చేయాలి తప్పదు.
