ఓ హీరోకి క‌ష్ట‌కాలంలో ఓ హిట్టిస్తే.. మామూలు విష‌య‌మా?  అలాంటిది ఒక‌టి కాదు, రెండు హిట్లు. అవి కూడా అలాంటిలాంటి హిట్లు కావు. ఆ హీరో కెరీర్‌లోనే మైలు రాళ్లు అన‌ద‌గిన విజయాలు అందిస్తే..??  కొర‌టాల శివ అదే చేశాడు.

క‌ష్ట‌కాలంలో ఉన్న మ‌హేష్ బాబుకి అప్పుడు శ్రీ‌మంతుడుతో, ఇప్పుడు భ‌ర‌త్ అనే నేను సినిమాతో మ‌ధుర‌మైన విజ‌యాల్ని అందించాడు. అందుకే కొర‌టాల అంటే.. మ‌హేష్‌కి అంత ఇష్టం ఏర్ప‌డింది. `మీ మేలు ఎప్ప‌టికీ తీర్చుకోలేను` అని కొర‌టాల‌పై మ‌హేష్ త‌న అభిమానాన్ని వీలున్న‌ప్పుడ‌ల్లా చూపిస్తూనే ఉన్నాడు. కొర‌టాల త‌న‌కు ఎంత స్పెష‌లో చెప్ప‌డానికి.. మ‌రో ప‌నికూడా చేశాడు.

మ‌హేష్ ట్విట్ట‌ర్‌ని ఫాలో అయ్యేవాళ్ల సంఖ్య ల‌క్ష‌ల్లో ఉంది. కానీ మ‌హేష్‌మాత్రం ఇంత‌కాలం గ‌ళ్లా జ‌య‌దేవ్ ట్విట్ట‌ర్‌నే ఫాలో అయ్యేవారు. ఇప్పుడు రెండో పేరు చేరింది. అది ఎవ‌రిదో కాదు, కొర‌టాల శివ‌ది. మ‌హేష్ ఫాలో అవుతున్న ట్విట్ట‌ర్ ఖాతాలు ఈ రెండే. కొర‌టాల‌కు మ‌హేష్ ఇచ్చిన స్థానం అది. మ‌హేష్ ఇచ్చిన ఈ స‌ర్‌ప్రైజ్ గిఫ్ట్‌తో కొర‌టాల ఉబ్బిత‌బ్బిబ్బ‌వుతున్నాడు.