`మ‌హ‌ర్షి` లాంటి సూప‌ర్ డూప‌ర్ హిట్ ని మహేష్ బాబు కి కానుక‌గా ఇచ్చాడు వంశీ పైడిప‌ల్లి. ఆ సినిమాతో మహేష్, వంశీల మ‌ధ్య రాపో బాగా బ‌ల‌ప‌డింది. మహేష్ ఇంట్లో ఓ స‌భ్యుడైపోయాడు వంశీ. మహేష్ ఇంట్లో ఏ కార్య‌క్ర‌మ‌మైనా...వంశీ ఉండాల్సిందే. ఆ అనుబంధంతోనే.. `మ‌హ‌ర్షి` వెంట‌నే మ‌రో సినిమా చేయ‌డానికి సైతం.. రెడీ అయ్యారు. కానీ... మ‌ధ్య‌లో ఏమైందో, ప‌ర‌శురామ్ వ‌చ్చేశాడు. వంశీ చెప్పిన క‌థ మహేష్ కి న‌చ్చ‌లేద‌ని, అందుకే ఆ సినిమా చేయ‌లేక‌పోయాడని టాక్.
అయితే వంశీ మాత్రం మహేష్ తో సినిమా చేయాల‌ని ప‌రిత‌పిస్తున్నాడు. ఓ క‌థ నచ్చ‌నంత మాత్రాన ఆగిపోతాడా? అందుకే మహేష్ కి న‌చ్చేంత వ‌ర‌కూ క‌థ‌లు త‌యారు చేస్తూనే ఉన్నాడ‌ట. ఈమ‌ధ్య మ‌హేష్‌కి ఓ కొత్త క‌థ వినిపించాడ‌ని, అది మహేష్ కి న‌చ్చింద‌ని స‌మాచారం. వంశీ పైడిప‌ల్లి అన్నీ స్టైలీష్ క‌థ‌లే తీశాడు. అయితే ఈసారి మంచి మాస్ క‌థ చెప్పాడ‌ట. సినిమాకి `స్టేట్ రౌడీ` అనే టైటిల్ కూడా ఫిక్స్ చేశాడ‌ని తెలుస్తోంది. అందుకే.... వంశీతో ప‌నిచేయ‌డానికి మహేష్ మ‌రోసారి గ్రీన్ సిగ్న‌ల్ ఇచ్చేశాడ‌న్న టాక్ వినిపిస్తోంది. మ‌రి ఇందులో నిజ‌మెంతో తెలియాలంటే ఇంకొన్ని రోజులు ఆగాలి.
