విజయ్‌ హీరోగా తెరకెక్కిన 'మెర్సల్‌' చిత్రం తెలుగులో 'అదిరింది' పేరుతో విడుదల కావాల్సి ఉంది. ఇదిగో రిలీజ్‌ అదిగో రిలీజ్‌ అంటున్నారు. కానీ సినిమా ఇంతవరకూ రిలీజ్‌ కాలేదు. రిలీజ్‌ డేట్‌ ఫిక్స్‌ చేశాక కూడా రాత్రికి రాత్రే సినిమా విడుదలని ఆపేశారు. అలా ఇంతవరకూ సినిమా ప్రేక్షకుల ముందుకు రాలేదు. ఇక ఇప్పట్లో వచ్చే అవకాశాలు కూడా కనిపించడం లేదు. దాదాపుగా ఇక లేనట్లే అని అనుకుంటున్నారు.
అయితే తాజాగా ఈ సినిమా రిలీజ్‌ విషయంలో వస్తోన్న సమాచారం ప్రకారం 'అదిరింది' సినిమాకి రీమేక్‌ ఆఫర్స్‌ ఎక్కువగా వస్తున్నాయట. దాంతో ఈ సినిమా తెలుగు వెర్షన్‌ ఆపేశారంటూ ప్రచారం జరుగుతోంది. బహుశా ఈ కారణంగానే సినిమా రిలీజ్‌ని ఆపేశారనుకోవాలేమో. ఏది ఏమైనా ఈ సినిమా తమిళంలో విడుదలై సెన్సేషన్‌ సృష్టించింది. స్ట్రెయిట్‌గా రిలీజ్‌ కాకపోయినా, ఆ వేవ్స్‌ టాలీవుడ్‌నీ కుదిపేశాయి.
గవర్నమెంట్‌పై రియల్‌ సెటైర్లు, వైద్యరంగంలోని అవినీతి కార్యకలాపాలని ఈ సినిమాలో స్ట్రెయిట్‌గా చూపించారు. సో ఆ కారణంగా సినిమా చుట్టూ వివాదాలు ఈగల్లా ముసురుకున్నాయి. అయినప్పటికీ, సినిమా మంచి విజయం సాధించింది. ప్రజల్లోకి సబ్జెక్ట్‌ బాగా చేరిపోయింది. విజయ్‌ నటన, స్టోరీ కాన్సెప్ట్‌ జనానికి బాగా నచ్చింది. అట్లీ దర్శకత్వంలో తెరకెక్కింది ఈ సినిమా. కాజల్‌ అగర్వాల్‌, సమంత, నిత్యామీనన్‌ హీరోయిన్లుగా నటించారు. విజయ్‌ త్రిపాత్రాభినయంలో కనిపించాడు.
