'నేను నా త‌మ్ముడి వెంటే' అని నాగ‌బాబు చాలా సంద‌ర్భాల్లో ప్ర‌క‌టించారు. ప‌వ‌న్ వ్య‌క్తిత్వం గురించి సోష‌ల్ మీడియాలో... గుట్ట‌ల కొద్దీ వీడియోల‌లో ప్ర‌సంగించారు నాగ‌బాబు. అయితే జ‌న‌సేన‌కు మ‌ద్ద‌తు మాట‌ల‌కే ప‌రిమితం చేశారు ఇంత వ‌ర‌కూ. ఇప్పుడు చేత‌ల్లోనూ చూపిస్తున్నారు. 2019 అసెంబ్లీ ఎన్నిక‌ల‌తో ప‌వ‌న్ క‌ల్యాణ్ ప్ర‌త్యక్ష రాజ‌కీయాల్లోకి దిగ‌బోతున్న సంగ‌తి తెలిసిందే. 

ప‌వ‌న్‌కి ఇప్పుడు మ‌ద్ద‌తుగా నాగ‌బాబు కూడా రంగంలోకి దిగిపోయారు. జ‌న‌సేన‌కు బాగా ప‌ట్టున్న ప్రాంతం ఉభ‌య‌గోదావ‌రి జిల్లాలు. ఈ రెండు జిల్లాల‌లోనూ వీలైన‌న్ని ఎక్కువ సీట్లు కైవ‌సం చేసుకోవాల‌ని జ‌న‌సేన ప్ర‌య‌త్నిస్తోంది. ఈ జిల్లాల‌లో జ‌న‌సేన బ‌లం ఏమిటో తెలుసుకోవ‌డానికి నాగ‌బాబు ర‌హ‌స్య యాత్ర‌కు శ్రీ‌కారం చుట్టారు. 

ప్ర‌స్తుతం నాగ‌బాబు తూర్పు, ప‌శ్చిమ గోదావ‌రి జిల్లాల‌లో ర‌హ‌స్యంగా ప‌ర్య‌టిస్తున్నార‌ని, అక్క‌డ జ‌న‌సేన మ‌ద్ద‌తు దారుల‌తో నాగ‌బాబు సుదీర్ఘంగా చ‌ర్చిస్తున్నార‌ని, తెదేపా, వైకాపా నుంచి జ‌న‌సేన‌కు రావాల‌ని ప్ర‌య‌త్నిస్తున్న కొంత‌మంది కీల‌క నేత‌ల‌ను క‌లుస్తున్నార‌ని తెలుస్తోంది. అప్ప‌ట్లో పీఆర్‌పీ స్థాపించిన‌ప్పుడు నాగ‌బాబు ఇలాంటి ప‌ర్య‌ట‌న‌లే చేశారు. కానీ ప్ర‌త్య‌క్ష రాజకీయాల్లో పాల్గొన‌లేదు. ఈసారీ ఆయ‌న తెర వెనుకే ఉంటార‌ని టాక్‌.