సమంతను పెళ్లాడిన తర్వాత ఈ మధ్యనే నాగ చైతన్య షూటింగ్‌లో బిజీ అయిపోయాడు. ప్రస్తుతం 'సవ్యసాచి' సినిమాలో నటిస్తున్నాడు నాగ చైతన్య. 'ప్రేమమ్‌' సినిమాతో హిట్‌ కొట్టిన చందూ మొండేటి ఈ సినిమాని తెరకెక్కిస్తున్నాడు. ఈ సినిమాలో చైతూ క్యారెక్టర్‌ చాలా కొత్తగా ఉండబోతోంది. ఈ సినిమా సెట్స్‌పై ఉండగానే ఇంకొన్ని స్టోరీలు లైన్‌లో పెట్టేస్తున్నాడు చైతూ. ఇప్పటికే మేనమామ వెంకీతో ఓ సినిమా చేస్తున్నాడు.  

ఇవి కాక మారుతి దర్శకత్వంలో ఓ సినిమా చేయాల్సి ఉంది. ఇవన్నీ ఇలా ఉండగా, మరో డైరెక్టర్‌నీ తాజాగా చైతూ లైన్‌లో పెట్టినట్టు సమాచారమ్‌. అది ఎవరో కాదు, 'ఉయ్యాలా జంపాలా' సినిమాతో విజయాన్ని అందుకున్న డైరెక్టర్‌ విరించి వర్మ. ఓ క్యూట్‌ లవ్‌ స్టోరీని చైతూ కోసం సిద్ధం చేసి ఉంచాడట. బహుశా ఈ సినిమాలో సమంత కూడా నటించే అవకాశాలున్నాయనీ ప్రచారం జరుగుతోంది. చైతూకి, సమంతతో ఓ రొమాంటిక్‌ స్టోరీలో నటించాలని ఉందని గతంలో చెప్పాడు. 

ఆ కోరిక విరించి వర్మ ద్వారా తీరేలా ఉంది కాబోలు. ఈ సినిమాని అన్నపూర్ణ బ్యానర్‌లో తెరకెక్కించే అవకాశాలున్నాయనీ తెలుస్తోంది. విరించి వర్మ నానితో 'మజ్ను' సినిమాని తీసి సక్సెస్‌ అయ్యాడు. ఇప్పుడు చైతూతో మరో సక్సెస్‌ కొడతాడేమో చూడాలి మరి. పెళ్లి తర్వాత చైతూ వరుసగా సినిమాలకు కమిట్‌ అవుతున్నాడు. పెళ్లికి ముందే చైతూ కెరీర్‌ సక్సెస్‌ బాట పట్టింది. వరుస విజయాలతో దూకుడు పెంచాడు మనోడు. ఇక పెళ్లి తర్వాత ఒప్పుకుంటున్న సినిమాలన్నీ వరుసగా సెట్స్‌ మీదికెళ్లనున్నాయట. 'సవ్యసాచి' సినిమా షూటింగ్‌ దాదాపు చివరి దశకు చేరుకుంది. ఈ సినిమా తర్వాత మారుతి దర్శకత్వంలో తెరక్కెబోయే సినిమాని పట్టాలెక్కించనున్నారట.