కొన్ని పాత్రల్లో కొందిరిని మాత్రమే ఊహించుకోగలం. ఆయా పాత్రలకు వాళ్లు తప్ప మరొకరు చేయలేరు. అలాంటి పాత్రే 'సోగ్గాడే చిన్ని నాయనా'లో నాగార్జున పోషించిన 'బంగార్రాజు' పాత్ర. ఆ పాత్రలో నాగార్జునని తప్ప మరొకర్ని ఊహించుకోగలమా. ఛాన్సే లేదు. ఆ హుందాతనం, చిలిపితనం నాగార్జునకే సొంతం. ఆ పాత్రకి నాగార్జున అయితే అందం. 'సోగ్గాడే చిన్ననాయనా' సినిమాకి సీక్వెల్‌ రానుందన్న సంగతి తెలిసిందే. కళ్యాణ్‌ కృష్ణ ఈ చిత్రాన్ని తెరకెక్కించారు. 'బంగార్రాజు' టైటిల్‌తో సీక్వెల్‌ తెరకెక్కబోతుందని నాగ్‌ గతంలోనే చెప్పారు. అయితే ఈ సీక్వెల్‌ విషయంలో కళ్యాణ్‌ కృష్ణ వేరే ఆలోచన చేయనున్నాడంటూ గాసిప్స్‌ వస్తున్నాయి. ఆ గాసిప్‌ని డైరెక్టర్‌ కళ్యాణ్‌ కృష్ణ ఖండించారు. ఆ పాత్రలో నాగార్జునని తప్ప మరొకర్ని ఊహించుకోవడం కష్టం. 'బంగార్రాజు' అంటే నాగార్జునే. ఆయన హీరోగానే ఈ సినిమా తెరకెక్కుతుంది అని కళ్యాణ్‌ కృష్ణ తేల్చేశారు. త్వరలోనే ఈ సినిమా సెట్స్‌ మీదికి వెళ్లనుంది. కథేంటి? ఇతర నటీనటులెవరు? అనే విషయాలు త్వరలోనే వెల్లడి కానున్నాయి. ఇటీవలే నాగార్జున 'రాజుగారి గది - 2' సినిమాతో ప్రేక్షకుల ముందుకు వచ్చారు. ప్రస్తుతం 'రాజుగారి గది - 2' సినిమా హిట్‌ని ఎంజాయ్‌ చేస్తున్నారు నాగ్‌. మరో పక్క చైతూ - సమంతల పెళ్లి, సినిమా ప్రమోషన్స్‌ అంటూ క్షణం తీరిక లేకుండా గడిపారు నాగార్జున ఈ మధ్య. దాంతో కొన్ని రోజులు రెస్ట్‌ తీసుకుని, ఫ్యామిలీతో సరదాగా గడిపి, తర్వాత తన షెడ్యూల్స్‌లో పాల్గొననున్నారనీ తెలియవస్తోంది. మరో వైపు నాగ్‌ - రామ్‌ గోపాల్‌ వర్మ కాంబినేషన్‌లో మరో సినిమా తెరకెక్కనుంది.