యువ హీరోల్లో నానికి మంచి మార్కెట్ ఉంది. ఏ,బీ,సీ అనే తేడా లేకుండా అన్ని చోట్లా టికెట్లు తెగ్గొట్ట‌గ‌ల హీరో నాని. ఓవ‌ర్సీస్‌లో అయితే నాని సినిమాకి ఢోకా లేదు. నాని సినిమా హిట్ట‌యితే.. అక్క‌డ వ‌సూళ్ల పండ‌గే. అందుకే నాని సినిమాల‌కు ఓవ‌ర్సీస్ రేటు బాగానే గిట్టుబాటు అవుతుంద‌టుంది. ఈ విష‌యంలో మ‌రోసారి తన స‌త్తా ఏపాటిదో చూపించాడు నాని.

నాని క‌థానాయ‌కుడిగా తెర‌కెక్కుతున్న తాజా చిత్రం `జెర్సీ`. గౌతమ్ తిన్ననూరి ద‌ర్శ‌కత్వం వ‌హించాడు. సితార ఎంట‌ర్‌టైన్‌మెంట్స్ సంస్థ నిర్మించిన ఈసినిమాకి మంచి బిజినెస్ జ‌రిగింది. తెలుగు రాష్ట్రాల రేట్లు బాగానే గిట్టుబాటు అయ్యాయి. ఇప్పుడు ఓవ‌ర్సీస్ కూడా అమ్ముడైపోయింది.

రూ. 4.5 కోట్ల‌కు బ్లూ స్కై సంస్థ ఈ సినిమా హ‌క్కుల్ని కొనుగోలు చేసింది. సంక్రాంతికి వ‌చ్చిన‌ ఎఫ్ 2 సినిమాని బ్లూ స్కై సంస్థ కొనుగోలు చేసింది. ఆ సినిమాతో రూపాయికి రెండు రూపాయ‌ల లాభం తెచ్చుకుంది. ఆ ఉత్సాహంతోనే ఈ సినిమానీ భారీ రేటుకి కొనుగోలు చేసింది. క్రికెట్ నేప‌థ్యంలో సాగే సినిమా ఇది. ఈ వేస‌విలో ప్రేక్ష‌కుల ముందుకు వ‌స్తోంది.