మహేష్ బాబు - త్రివిక్ర‌మ్ కాంబినేష‌న్‌లో ఇప్ప‌టి వ‌ర‌కూ రెండు సినిమాలొచ్చాయి. ఇప్పుడు ఈ కాంబో.. హ్యాట్రిక్ కొట్ట‌డానికి సిద్ధ‌మైంది. మహేష్ - త్రివిక్ర‌మ్ కాంబినేష‌న్‌లో ముచ్చ‌ట‌గా మూడో చిత్రం ప‌ట్టాలెక్క‌బోతున్న సంగ‌తి తెలిసిందే. త్వ‌ర‌లోనే ప‌ట్టాలెక్క‌బోయే ఈ చిత్రానికి సంబంధించి ఓ ఆస‌క్తిక‌ర‌మైన వార్త టాలీవుడ్ లో చ‌క్క‌ర్లు కొడుతోంది. అదేంటంటే.. ఈ చిత్రంలో ఓ కీల‌క‌మైన పాత్ర కోసం న‌య‌న‌తార‌ని ఎంచుకున్నార్ట.
మాజీ హీరోయిన్ల‌కు కీల‌క‌మైన పాత్ర‌లు అప్ప‌గించి, ఆ సినిమా స్థాయి పెంచ‌డంలో - త్రివిక్ర‌మ్ ది అందివేసిన చేయి. న‌దియా, ఖుష్బూ, ట‌బు.. ఇలా ఒక‌ప్ప‌టి హీరోయిన్ల‌కు త‌న సినిమాల్లో కీల‌క పాత్ర‌లు ఇచ్చాడు. మహేష్ సినిమా కోసం కూడా అలాంటి ఫీట్ చేయ‌బోతున్న‌ట్టు తెలుస్తోంది. ఈ సినిమాలో ఓ కీల‌క‌మైన పాత్ర కోసం న‌య‌న‌తార‌ని ఎంచుకుంటే ఎలా ఉంటుంద‌న్న ఆలోచ‌న‌లో త్రివిక్ర‌మ్ ఉన్నాడ‌ట. అయితే ఇది కేవ‌లం ఆలోచ‌న మాత్ర‌మే. అది దాటి ఒక్క అడుగు కూడా ముందుకు వేయ‌లేదు. న‌య‌న‌తో వ్య‌వ‌హారం అంటే... చాలా త‌ల‌నొప్పులు ఉంటాయి. ముఖ్యంగా త‌ను అడిగినంత పారితోషికం ఇవ్వాల్సిందే. అందుకు హారిక హాసిని సంస్థ సిద్ధ‌ప‌డాలి. మహేష్ సినిమా కాబ‌ట్టి.. న‌య‌న‌తార ఒకే అంటే ఎంత పారితోషికం అయిన ఇస్తారు. కానీ.. న‌య‌న ఒప్పుకుంటుందో లేదో చూడాలి. ఒకవేళ న‌య‌న ఓకే అంటే.. ఇదో సంచ‌ల‌న కాంబినేష‌న్ అవుతుంది.
