బాలయ్య - తేజ కాంబినేషన్‌లో ఎన్టీఆర్‌ బయోపిక్‌ తెరకెక్కుతోన్న సంగతి తెలిసిందే. ఈ సినిమాలో హీరోయిన్‌గా బాలయ్య మళ్లీ నయనతారను తీసుకొస్తున్నాడనే వార్తలు వినిపిస్తున్నాయి. ఈ ఏడాది సంక్రాంతికి వచ్చిన 'జై సింహా' సినిమాలో ఆల్రెడీ నయనతార, బాలయ్యతో జత కట్టింది. 'జై సింహా'తో కలిపి ముచ్చటగా మూడోసారి నయనతారను హీరోయిన్‌గా ఎంచుకున్నాడు బాలయ్య. 

ఇప్పుడు నాలుగోసారి కూడా ఆమెనే హీరోయిన్‌గా సూచిస్తున్నాడనీ టాలీవుడ్‌ వర్గాల్లో గుసగుసలు వినిపిస్తున్నాయి. అయితే ప్రస్తుతం నయనతార సో బిజీ. తమిళంలో వరుస సినిమాలతో బిజీగా ఉంది. మరో పక్క తెలుగులో చిరంజీవి 151వ సినిమా 'సైరా నరసింహారెడ్డి'లో నటిస్తోంది. బాలయ్య అడిగితే నయనతార కాదనదు కానీ, ఒకవేళ నయన్‌ డేట్స్‌ అడ్జస్ట్‌ కాకపోతే, ఆ ప్లేస్‌ని ముద్దుగుమ్మ శ్రియ కోసం కేటాయించే ఆలోచనలో ఉన్నాడట బాలయ్య. శ్రియకు కూడా బాలయ్య ఈ మధ్య వరుసగా రెండు సినిమాల్లో ఛాన్సిచ్చేశాడు. 

2017 సంక్రాంతికి 'గౌతమీ పుత్ర శాతకర్ణి' సినిమాలో శ్రియ, బాలయ్యతో కలిసి నటించింది. మంచి హిట్‌ అందుకుంది. కానీ తర్వాత 'పైసా వసూల్‌' సినిమాతో ఈ జంట నిరాశపరిచింది. మళ్లీ శ్రియకి ఛాన్సివ్వాలనుకోవడం వెనుక బాలయ్య ఆంతర్యం ఏమిటో కానీ, కొత్త హీరోయిన్స్‌ వైపు బాలయ్య దృష్టి పెట్టకపోవడమేంటా? అని ఆయన అభిమానులు వాపోతున్నారు. చూడాలి మరి బాలయ్య 'ఎన్టీఆర్‌' కోసం రాబోయే ఆ హీరోయిన్‌ ఎవరో? ఈ మధ్యనే 'ఎన్టీఆర్‌' సినిమా ఫస్ట్‌లుక్‌ కోసం ట్రైల్‌ షూట్‌ చేశారు. 

అయితే సినిమా రెగ్యులర్‌ షూటింగ్‌ ఇంకా మొదలు కావాల్సి ఉంది.