'పచ్చబొట్టూ చెరిగిపోదులే.. పడుచు గుండె చెదిరిపోదులే.. ' అని అప్పుడెప్పుడో అక్కినేని నాగేశ్వరరావు, వాణిశ్రీ 'దసరా బుల్లోడు' సినిమాలో పాటేస్కున్నారు. వారిద్దరి ప్రేమకు గుర్తుగా ఆ పాట చిత్రీకరించారు డైరెక్టర్‌ ఆ సినిమాలో. ఈ పాట మాత్రం వెరీ వెరీ పాపులర్‌.. అప్పటికీ, ఇప్పటికీ, ఎప్పటికీనూ. అయితే అసలు ఈ పాట హిస్టరీ ఎందుకు బయటికి వచ్చిందంటారా? ఉంది మరి. కొన్నాళ్ల క్రితం ముద్దుగుమ్మ నయనతార, ఇండియన్‌ మైఖేల్‌ జాక్సన్‌ ప్రభుదేవాతో పీకల్లోతు ప్రేమలో ఉన్న సంగతి తెలిసిందే. అప్పట్లో వీరి ప్రేమ ఓ సెన్సేషన్‌. ప్రేమ ముదిరి పెళ్లి పీటలెక్కే సమయానికి బ్రేకప్‌ వచ్చేసింది ఈ ఇద్దరి మధ్యా. తృణ ప్రాయంగా ఇద్దరూ వారి లవ్‌ స్టోరీకి సెండాఫ్‌ ఇచ్చేశారు. అయితే ప్రేమ ముదిరి పాకాన ఉన్న టైంలో కొన్ని ప్రేమ గుర్తులు మాత్రం చెరిగిపోనీయకుండా పదిలపరచుకున్నారు. ఆ ప్రేమ చిహ్నమే పచ్చబొట్టు. నయనతార చేతిపై 'పి.డి' అనే పచ్చబొట్టు ఉంది. ప్రభుదేవాతో ప్రేమలో ఉన్న టైంలో ఈ పచ్చబొట్టు వేయించుకుంది. అప్పుడే చెప్పింది నయన్‌ ఈ పచ్చబొట్టును ఎప్పటికీ తీయననీ, ప్రభుదేవాపై ప్రేమకు గుర్తుగా ఎప్పటికీ తన చేతిపై ఉంచుకుంటాననీ.. తాజాగా ఆమె చేతిపై ఈ పచ్చబొట్టు తారసపడింది. శివకార్తికేయన్‌తో ఓ సినిమా చేస్తోంది ప్రస్తుతం నయనతార. ఆ సినిమా సాంగ్‌ షూటింగ్‌లో దిగిన ఫోటోలో ఈ పచ్చబొట్టు కెమెరాకి చిక్కింది. దాంతో ప్రభుదేవా, నయన్‌ల ప్రేమ వ్యవహారం తలంపుకొచ్చింది. అయితే ఇదంతా ప్రస్తుతం గతం. తాజాగా ఓ తమిళ డైరెక్టర్‌తో ప్రస్తుతం మళ్లీ ప్రేమలో ఉంది ఒకపక్క నయన్‌. మరో పక్క తమిళ, తెలుగు సినిమాలతోనూ బిజీ అయిపోయింది. అలాగే ప్రభుదేవా బాలీవుడ్‌ సినిమాల డైరెక్షన్‌లో బిజీగా ఉన్నాడు. అదీ సంగతి.