రామ్ కెరీర్‌లోనే క‌ళ్లు చెదిరే హిట్టు `ఇస్మార్ట్ శంక‌ర్‌`తో ద‌క్కింది. తాను కూడా ఈ సినిమా ఈ స్థాయిలో విజ‌యం సాధిస్తుంద‌ని అనుకోలేదేమో..? ఓ హిట్టు ద‌క్క‌డం కాదు, దాన్ని కాపాడుకోవ‌డం చాలా ముఖ్యం. ప్ర‌స్తుతం రామ్ అదే ప‌నిలో ఉన్నాడు. `ఇస్మార్ట్ శంక‌ర్‌` త‌ర‌వాత రామ్ ఏమాత్రం తొంద‌ర ప‌డ‌లేదు. మాస్ సినిమా చేస్తే హిట్టు వ‌చ్చింది క‌దా అని అదే దారిలో వెళ్ల‌డం లేదు.
ఇప్పుడో థ్రిల్ల‌ర్ క‌థ‌ని ఎంచుకున్నాడు. కిషోర్ తిరుమ‌ల ద‌ర్శ‌క‌త్వంలో రామ్ ఓ సినిమా చేయ‌బోతున్నాడు. త‌మిళ `త‌డ‌మ్` చిత్రానికి ఇది రీమేక్‌. యాక్ష‌న్ థ్రిల్ల‌ర్ చిత్రంగా తెర‌కెక్కిన త‌డ‌మ్ త‌మిళంలో మంచి విజ‌యం అందుకుంది. హీరోయిజం కంటే.. క‌థ‌కే పెద్ద పీట వేసిన చిత్ర‌మిది. మాస్ ఉంటూనే క్లాసీ ట‌చ్‌తో సాగుతుంది. ఎప్పుడూ ఒకే త‌ర‌హా సినిమాలు చేస్తే బోర్ కొడుతుంది. అదెలా ఉంటుందో.. రామ్‌కి తెలుసు.
'రాముడు మంచి బాలుడు' టైపులో వ‌రుస‌గా సినిమాలు చేస్తూ చేస్తూ.. దాన్ని బ్రేక్ చేయ‌డానికి పూరితో జ‌ట్టు క‌ట్టాడు. అనుకున్న ఫ‌లితం వ‌చ్చేసింది. అందుకే ఇప్పుడు మ‌ళ్లీ రూటు మార్చి థ్రిల్ల‌ర్ క‌థ‌ని ఎంచుకున్నాడు. రామ్ వెళ్తున్న దారి క‌రెక్టే. ఎప్పుడూ ఒకే ర‌క‌మైన క‌థ‌లు చేస్తే హీరోల‌కే కాదు, ప్రేక్ష‌కుల‌కూ బోర్ కొడుతుంది. ఆ మార్పు అవ‌స‌ర‌మే!
