బాలీవుడ్ యువ హీరో సుశాంత్ సింగ్ రాజ్‌పుట్ ఆత్మ‌హ‌త్య చిత్ర‌సీమ‌ని కుదిపివేసింది. `ఇంత ప్ర‌తిభావంత‌మైన న‌టుడు, విజ‌య‌వంత‌మైన క‌థానాయ‌కుడు ఇలాంటి నిర్ణ‌యం తీసుకోవ‌డం ఏమిటి?` అంటూ ఆశ్చ‌ర్య‌పోయింది. ఈ ఆత్మ‌హ‌త్య వెనుక ఇప్పుడిప్పుడే ఎన్నో అనుమానాలు బ‌య‌ట‌ప‌డుతున్నాయి. సుశాంత్ గ‌త కొంత‌కాలంగా డిప్రెష‌న్ లో ఉన్నాడ‌ని, అందుకు సంబంధించిన చికిత్స కూడా తీసుకుంటున్నాడ‌ని పోలీసుల ప్రాధ‌మిక ప‌రీక్ష‌లో నిర్దార‌ణ అయ్యింది. అందుకే దీన్ని ఆత్మ‌హ‌త్య‌గా భావిస్తున్నారు. కానీ.. సుశాంత్ ది ఓ ల‌వ్ ఫెయిల్యూర్ స్టోరీ అని ఆయ‌న స‌న్నిహితులు చెబుతున్నారు.
సుశాంత్ కి ఇది వ‌ర‌కు ఓసారి బ్రేక‌ప్ అయ్యింది. ఆ త‌ర‌వాత కొంత‌కాలానికి క‌థానాయిక కృతి స‌న‌న్ తో సుశాంత్ డేటింగ్ చేశాడు. కొంత‌కాలానికి ఇద్ద‌రూ విడిపోయారు. ఈమ‌ధ్య కృతి స‌న‌న్ మ‌ళ్లీ ట‌చ్‌లోకి వ‌చ్చింద‌ని, ఇద్ద‌రూ మ‌ళ్లీ ఇదివ‌ర‌క‌టిలా క‌లిశార‌ని తెలుస్తోంది. ఈమ‌ధ్యే సుశాంత్ మాజీ మేనేజ‌ర్ దిశ ఆత్మ‌హ‌త్య చేసుకున్నారు. ఆ ఘ‌ట‌న సుశాంత్‌ని బాగా క‌ల‌చి వేసింద‌ని చెప్పుకుంటున్నారు. ఈ విష‌యాల‌న్నీ సుశాంత్‌ని మాన‌సికంగా మ‌రింత కృంగిపోయేలా చేశాయి. అందుకే ఆత్మ‌హ‌త్య చేసుకోవాల‌న్న నిర్ణ‌యానికి వ‌చ్చి ఉంటాడు. అయితే సుశాంత్ ది ఆత్మ‌హ‌త్య కాద‌ని, హ‌త్య అని కుటుంబ స‌భ్యులు ఆరోపిస్తున్నారు. ఈ విష‌య‌మై పోలీసులు కూలంకుశంగా ద‌ర్యాప్తు చేయాల‌ని కోరుకుంటున్నారు. పోలీసులు అన్ని వైపుల నుంచీ... ద‌ర్యాప్తు ముమ్మ‌రం చేస్తే అస‌లు నిజాలు బ‌య‌ట‌ప‌డ‌తాయి.
