షకీలా.. కొన్నేళ్ళ క్రితం వెండితెరను ఓ ఊపు ఊపేసిన బి-గ్రేడ్‌ సినిమాల స్పెషలిస్ట్‌. మలయాళ సూపర్‌ స్టార్స్‌ సైతం షకీలా సినిమాల్ని చూసి భయపడే పరిస్థితి వచ్చింది. సినిమా ఆడేది నాలుగైదు రోజులు మాత్రమే అయినా, థియేటర్లలో షకీలా సినిమాలంటే ప్రభంజనమే. షకీలా నటించిన కొన్ని సినిమాలైతే ఏకంగా 100 రోజులు ఆడేశాయ్‌. మలయాళ సినిమాల్ని తెలుగు, తమిళం, కన్నడ, హిందీ తదితర భాషల్లోకి డబ్‌ చేసినా డబ్బులు బాగానే వచ్చేసేవి.

ఇప్పుడు ఆ షకీలా జీవిత చరిత్రను తెరకెక్కించారు. బాలీవుడ్‌ భామ రిచా చద్దా ప్రధాన పాత్రలో నటించిన ఈ సినిమా త్వరలో విడుదల కాబోతోంది. ఈ సినిమా తాజా ప్రోమో, సినిమాపై అంచనాల్ని పెంచేస్తోంది. అయితే, షకీలా సినిమా అనగానే అందులో నగ్న దృశ్యాలే చాలామందికి గుర్తొస్తాయి. మరి, అలాంటి సన్నివేశాలు 'షకీలా' సినిమాలో వుంటాయా.? లేదా.? అన్నదే ఇప్పుడు చర్చనీయాంశం. షకీలా కూడా ఈ సినిమాకి చాలా ఇన్‌పుట్స్‌ ఇచ్చేసింది.

ఆ లెక్కన, ఈ సినిమాలో నగ్న దృశ్యాలు వుండకపోవచ్చు. పైగా, సినిమా అంతా షకీలా కోణంలోనే వుండబోతోంది. దాంతో, అడల్ట్‌ కంటెంట్‌ కంటే వివాదాస్పద సన్నివేశాలకే ఎక్కువ ప్రాధాన్యత ఇచ్చి వుండొచ్చని అంటున్నారు. కొందరు హీరోలు తనకు వ్యతిరేకంగా చేసిన కుట్రలపై షకీలా తరచూ మాట్లాడుతుంటుంది. అవన్నీ బహుశా సినిమాలో వుంటాయేమో.! కానీ, షకీలా సినిమా అంటే, కావాల్సింది.. 'ఆ టైపు' కంటెంటే.! దానికోసం అదనంగా షకీలా సినిమాల్లో యాడ్‌ చేసినట్లుగా ఇందులోనూ చేస్తారేమో.!