దేశం గర్వించదగ్గ సినిమా 'బాహుబలి'ని తెరకెక్కించిన డైరెక్టర్‌ రాజమౌళి. ఇదే రాజమౌళి చరణ్‌తో 'మగధీర' చిత్రాన్ని తెరకెక్కించి, సెన్సేషన్‌ అయ్యాడు. తొలి వంద కోట్లు వసూళ్లు రాబట్టిన సినిమాగా రికార్డుకెక్కింది 'మగధీర'. కాగా ఎన్టీఆర్‌తో భారీ బడ్జెట్‌ మూవీ అయిన 'యమదొంగ' చిత్రాన్ని తెరకెక్కించిన ఘనత కూడా ఆయనదే. అయితే ప్రస్తుతం ఈ ఇద్దరు స్టార్‌ హీరోస్‌తోనూ రాజమౌళి ఆప్యాంగా కలిసున్న ఫోటో సోషల్‌ మీడియాలో హల్‌ చల్‌ చేస్తోంది. ఈ ఫోటోని పోస్ట్‌ చేసింది రాజమౌళినే. 

అంటే ఈ కాంబినేషన్‌లో రాజమౌళి సినిమా చేస్తున్నాడంటూ వార్తలు గుప్పుమంటున్నాయి. అంతేకాదు, ఈ సినిమాలో ఎన్టీఆర్‌ - చరణ్‌ క్యారెక్టర్స్‌పై కూడా పుకార్లు షికారు చేస్తున్నాయి. ఈ కాంబినేషన్‌లో తెరకెక్కే సినిమాలో ఈ ఇద్దరూ అన్నదమ్ముల్లా నటిస్తారంటూ ఓ పక్క ప్రచారం జరుగుతుండగా, లేదు లేడు బావ బావమరుదుల్లా నటిస్తారంటూ మరోపక్క ప్రచారం జరుగుతోంది. 

ఈ కాంబినేషన్‌లో రాబోయే చిత్రం 'బాహుబలి'ని మించిన భారీ బడ్జెట్‌తో తెరకెక్కుతుందనీ 'బాహుబలి'ని మించిన విజయం సాధిస్తుందనీ గుసగుసలు స్టార్ట్‌ అయిపోయాయి. అయితే ఈ వార్తలన్నింట్లోనూ నిజమెంతుందో తెలీదు కానీ, అసలింతకీ ఈ కాంబినేషన్‌ని కన్‌ఫామ్‌ చేసిందెవరో తెలుసా! మెగా మేనల్లుడు సాయిధరమ్‌ తేజ్‌. 

సోషల్‌ మీడియాలో ఈ ఫోటో చూడగానే ఈ కాంబినేషన్‌ వర్కవుట్‌ అయితే బాగుంటుందనీ అనుకున్నాడట. కానీ ఏదో సరదాగా ఫోటో దిగారులే అనుకున్నాడట. అయితే అదేంటో తేల్చుకోవాలని, ఆ కోణంలో కొంచెం కూపీ లాగేందుకు ట్రై చేశాడట మన అల్లరి పిల్లోడు తేజు. ఆ రకంగా ఇదేం సరదా ఫోటో కాదనీ, నిజమేననీ తెలిసిందట తేజుకి. అదే విషయాన్ని తేజు చెబుతున్నాడు. అంటే ఈ కాంబినేషన్‌ త్వరలో సెట్స్‌ మీదికి వెళ్లే అవకాశాలు లేకపోలేదనడానికి తేజు మాట ఓ నిదర్శనమనుకోవచ్చునేమో!