అక్కినేని కోడలు సమంత - నందినీ రెడ్డి కాంబినేషన్‌లో ఓ సినిమాలో నటిస్తున్న సంగతి తెలిసిందే. ఈ సినిమాకి 'ఓ బేబీ' అనే టైటిల్‌ ఇంతవరకూ ప్రచారంలో ఉంది. ఈ టైటిల్‌ని కన్‌ఫామ్‌ చేస్తూ సమంత ట్విట్టర్‌లో పోస్ట్‌ చేసింది. టైటిల్‌తో పాటు, సమంత లుక్‌ కూడా సోషల్‌ మీడియాలో షేర్‌ చేసింది. ఈ లుక్‌లో సమంత గాయనిగా కనిపిస్తోంది. లుక్‌ చాలా అద్భుతంగా ఉందంటూ రెస్పాన్స్‌ వస్తోంది.
కొరియన్‌ మూవీకి తెలుగు రీమేక్‌గా తెరకెక్కుతోన్న ఈ సినిమాలో సమంత ఓ క్రిటికల్‌ రోల్‌ పోషిస్తోంది. 60 ఏళ్ల బామ్మ టీనేజ్‌ వయసులో ఉన్న తన మనవరాలిగా ఎలా మారిపోయింది.? అనే కాన్సెప్ట్‌తో రూపొందుతోన్న సినిమా ఇది. 'నా మార్గాన్ని ఎంచుకోవడానికి ఆ దేవుడు, నా చుట్టూ ఉన్న వాళ్లూ నాకెంతో సహకరించారు. ఈ క్రమంలో నేను ఎన్నో ఎత్తుపల్లాల్ని ఎదుర్కొన్నాను.
ఇవాళ నేను నా వృద్ధిలోని సంతృప్తిని ఆస్వాదిస్తున్నా.. 'ఓ బేబీ' షూటింగ్‌ పూర్తి చేసుకున్నా. ఈ ప్రాజెక్టు నాకెంతో ప్రత్యేకం. నందినీ రెడ్డి నాకు ఎంతో ఇష్టమైన పాత్రను ఇచ్చారు..' అని సమంత ట్విట్టర్‌లో పేర్కొన్నారు. అంటే 'ఓ బేబీ..' షూటింగ్‌ కూడా పూర్తయిపోయిందని తెలుస్తోంది. మరోవైపు 'మజిలీ' సినిమా విడుదలకు సిద్ధమైంది. ఏప్రిల్‌ 5న 'మజిలీ' ప్రేక్షకుల ముందుకు రానుంది. ఇది కాక యంగ్‌ హీరో శర్వానంద్‌తో '96' మూవీలోనూ సమంత నటిస్తోంది.
