'బాహుబలి' సినిమాని తెరకెక్కించిన నిర్మాతల్లో ఒకరైన శోభు యార్లగడ్డ అందరికీ సుపరిచితుడే. 'బాహుబలి' తర్వాత రాజమౌళి నుండి రాబోతున్న సినిమా 'ఆర్‌ఆర్‌ఆర్‌'. ఈ సినిమా కథ, కమామిషు, హీరోయిన్లు, బడ్జెట్ లెక్కలు.. ఇలా అన్ని వివరాలనూ రాజమౌళి ఓ ప్రెస్‌ మీట్‌ పెట్టి ప్రేక్షకుల ముందుంచిన సంగతి తెలిసిందే.
జూలై 30, 2020 సంవత్సరం 'ఆర్‌ఆర్‌ఆర్‌' రిలీజ్‌ డేట్‌ అని రాజమౌళి ఈ సందర్భంగా తెలియజేశారు. అందుకే ఆ డేట్‌ కోసం నేను ఎంతో ఆతృతగా ఎదురు చూస్తున్నాను అని శోభు యార్లగడ్డ సోషల్‌ మీడియాలో ఓ ట్వీటేశారు. ఆ ట్వీట్‌కి ఓ నెటిజన్‌ అంత నమ్మకమేంటీ.? అదే డేట్‌కి 'ఆర్‌ఆర్‌ఆర్‌' విడుదలవుతుందనుకుంటున్నారా.? అని ప్రశ్నించాడు. అంటే ఆ నెటిజన్‌కి రాజమౌళిపై నమ్మకం లేదని అర్ధం చేసుకోవాలి.
అయితే శోభు యార్లగడ్డ ఎంత మాత్రం తడబడకుండా ఖచ్చితంగా అదే డేట్‌కి విడుదలవుతుంది.. 'బాహుబలి 2' కూడా చెప్పిన డేట్‌కే విడుదలయ్యింది అంటూ ఆ నెటిజన్‌కి గట్టి సమాధానమిచ్చారు. అంటే ఆయనకు రాజమౌళిపై ఎంత నమ్మకమో అర్ధం చేసుకోవాలి. ఇక 'ఆర్‌ఆర్‌ఆర్‌' విషయానికి వస్తే, డివివి దానయ్య నిర్మాతగా వ్యవహరిస్తున్నారు. డైరెక్టర్‌గా రాజమౌళి ఎంత జోరు మీదున్నారో, నిర్మాత దానయ్య కూడా అంతకు మించిన జోరు మీదున్నారు. బడ్జెట్ విషయంలో అస్సలేమాత్రం తగ్గేలా లేరీయన.
