శర్వానంద్‌ ప్రస్తుతం రెండు సినిమాల్లో నటిస్తున్నాడు. సుధీర్‌ వర్మ దర్శకత్వంలో తెరకెక్కుతోన్న సినిమా ఒకటి కాగా, ఇంకోటి తమిళ సూపర్‌ హిట్‌ మూవీ '96' రీమేక్‌. ఈ సినిమాలో సమంత, శర్వానంద్‌ జంటగా నటిస్తున్నారు. ఒరిజినల్‌ డైరెక్టర్‌ ప్రేమ్‌కుమార్‌ ఈ రీమేక్‌ని రూపొందిస్తున్నారు. వెంకటేశ్వర క్రియేషన్స్‌ బ్యానర్‌లో దిల్‌రాజు నిర్మిస్తున్నారు.
అతి తక్కువ రోజుల్లోనే ఈ సినిమాని పూర్తి చేసేయాలని చిత్ర యూనిట్‌ భావిస్తోందట. కేవలం 36 రోజుల టైమ్‌ పీరియడ్‌ అనీ తెలుస్తోంది. అంటే హీరో, హీరోయిన్‌ సీన్లతో పాటు, మరికొన్ని సీన్లు మాత్రమే రీమేక్‌ చేయబోతున్నారట. చాలా సీన్లను ఒరిజినల్‌ నుండి డైరెక్ట్‌గా తీసుకోనున్నారనీ తెలుస్తోంది. ఆల్రెడీ మారిషస్‌ అడవుల్లో షూటింగ్‌ స్టార్ట్‌ చేశారట. ఈ క్రమంలోనే ఓ సీన్‌ కోసం శర్వానంద్‌ స్కూబా డైవింగ్‌ నేర్చుకున్నాడట.
'118' కోసం కళ్యాణ్‌రామ్‌ కూడా స్కూబా డైవింగ్‌లో ప్రత్యేక శిక్షణ తీసుకున్న సంగతి తెలిసిందే. ఆ సినిమా కళ్యాణ్‌రామ్‌కి సక్సెస్‌నిచ్చింది. అలాగే శర్వాకీ ఈ సినిమా కలిసొస్తుందేమో చూడాలి మరి. వైల్డ్‌ లైఫ్‌ ఫోటోగ్రాఫర్‌గా శర్వానంద్‌ కనిపించనున్నాడు ఈ సినిమాలో. తాజా షెడ్యూల్‌ కోసం కెన్యా పయనమైందట శర్వా టీమ్‌. ఇదిలా ఉంటే, ఇటీవల సమంత 'మజిలీ'తో మంచి హిట్‌ కొట్టింది. ఆల్రెడీ హిట్‌ సినిమా కాబట్టి, ఈ సినిమాతో మరో హిట్‌ సమంత ఖాతాలో ఉన్నట్లే అనుకోవాలి.
