ఈసారి వైకాపా పార్టీలో సినీ గ్లామ‌ర్ ఎక్కువ‌గా క‌నిపిస్తోంది. పోసాని, అలీ, ఫృథ్వీ, రోజా.. వీళ్లంతా ఆ పార్టీ వాళ్లే. ఇప్పుడు మ‌రో న‌టుడు వైకాపాలో చేరిపోయాడు. ఆయ‌నే శివాజీ రాజా. `మా` ఎన్నిక‌ల‌లో ఓడిపోయిన శివాజీ రాజా ఇప్పుడు ఆ స‌మ‌యాన్ని వైకాపా కోసం కేటాయించాల‌ని నిర్ణయించుకున్నారు. మ‌రి కాసేప‌ట్లో ఆయ‌న వైకాపా పార్టీలోకి అధికారికంగా చేర‌బోతున్నారు.
`నాగ‌బాబుకి రిట‌ర్న్ గిఫ్ట్ ఇస్తా` అని ఇటీవ‌ల శివాజీ రాజా వ్యాఖ్యానించిన సంగ‌తి తెలిసిందే. నాగ‌బాబు ప్ర‌స్తుతం జ‌న‌సేన‌లో ఉన్నారు. న‌ర‌సాపురం నుంచి పార్ల‌మెంటుకు పోటీ చేస్తున్నారు. నాగ‌బాబు జ‌న‌సేన కండువా క‌ప్పుకుని 24 గంట‌లు కాక‌ముందే... శివాజీ రాజా వైకాపాలో చేర‌డం చ‌ర్చ‌నీయాంశం అవుతోంది. నాగ‌బాబుని ఇరుకున పెట్ట‌డానికే.. శివాజీ రాజా ఇదంతా చేస్తున్నార‌ని ప్ర‌చారం జ‌రుగుతోంది.
న‌ర‌సాపురంలో శివాజీ రాజా వైకాపా త‌ర‌పున ప్ర‌చారం చేస్తార‌ని, నాగ‌బాబు గెలుపుని ప‌రోక్షంగా అడ్డుకోవ‌డానికి కృషి చేస్తార‌ని చెప్పుకుంటున్నారు. సినిమాలో మొద‌లైన వైరం ఇప్పుడు రాజ‌కీయాల‌కు షిఫ్ట్ అయ్యింద‌న్న‌మాట. 800 మంది స‌భ్యులున్న `మా`లోనే గెల‌వ‌లేక‌పోయిన శివాజీరాజా... ఇప్పుడు న‌ర‌సాపురం రాజ‌కీయాల‌ను ప్ర‌భావితం చేయ‌గ‌ల‌డా? చూద్దాం...!
