జస్ట్‌ 27 సెకన్ల వీడియోతో యావత్‌ భారతదేశాన్ని ఉర్రూతలూగించేసింది మలయాళీ ముద్దుగుమ్మ ప్రియా ప్రకాష్‌ వారియర్‌. ఎన్నో సినిమాలు చేసిన ఓ స్టార్‌కి దక్కే ఇమేజ్‌ని ఒక్క రాత్రిలోనే ఈ బ్యూటీ దక్కించేసుకుంది. మలయాళంలో తెరకెక్కిన 'ఒరు అధార్‌ లవ్‌' అనే సినిమాలో మెయిన్‌ హీరోయిన్‌ పక్కన సెకండ్‌ హీరోయిన్‌గా నటించిన ఈ బ్యూటీకి వచ్చిన క్రేజ్‌తో ఆ సినిమా అక్కడ సూపర్‌ డూపర్‌ హిట్‌ అవ్వడంతో పాటు, దేశం మొత్తం ఈ బ్యూటీ గురించి ఆరా తీసేసేలా చేసింది.
అక్కడితో సోషల్‌ మీడియాలో అమ్మడికున్న ఫాలోయింగ్‌ ఇక చెప్పనే అక్కర్లేదు. ఇలా వచ్చిన క్రేజ్‌తో అమ్మడు ఆల్రెడీ బోలెడన్ని రాళ్లు వెనకేసేసుకుందిలెండి అది వేరే విషయం. అయితే ఆ తర్వాత సినిమాల్లో పెద్దగా నటించలేదు కానీ, కమర్షియల్‌ యాడ్స్‌లో మాత్రం తెగ దున్నేసుకుంది. ఇకపోతే ఇంత క్రేజ్‌కి కారణమైన 'ఒరు అధార్‌ లవ్‌' చిత్రాన్ని సుఖీభవ సినిమాస్‌ సంస్థ తెలుగులో విడుదల చేసేందుకు సన్నాహాలు చేస్తోంది.
'లవర్స్‌డే' టైటిల్‌తో ఈ సినిమాని వేలంటైన్స్‌డే సందర్భంగా ఫిబ్రవరి 14న తెలుగు ప్రేక్షకుల ముందుకు తీసుకురానున్నారు. ఆ క్రమంలో జనవరి 23న ప్రీ రిలీజ్‌ ఫంక్షన్‌ని ఘనంగా ఏర్పాటు చేశారు. ఈ వేడుకకు స్టైలిష్ స్టార్ అల్లు అర్జున్‌ ముఖ్య అతిధిగా విచ్చేయనున్నారని తాజా సమాచారం. జస్ట్‌ టీజర్‌ వీడియోతోనే సంచలనాలు సృష్టించిన ప్రియా ప్రకాష్‌ వారియన్‌ని 'లవర్స్‌డే' ద్వారా తెలుగు కుర్రోళ్లు ఎలా ఆదరిస్తారో చూడాలిక.
