మలయాళంలో ఘనవిజయం సాధించిన సినిమా 'టూ కంట్రీస్‌'. దిలీప్‌, ఇషా తల్వార్‌, మమతా మోహన్‌దాస్‌ ప్రధాన పాత్రల్లో నటించారు. ఈ సినిమాని తెలుగులో రీమేక్‌ చేస్తున్నారు. తెలుగులోనూ అదే టైటిల్‌తో ఈ సినిమాను రీమేక్‌ చేస్తున్నారు. సునీల్‌ హీరోగా నటిస్తున్నాడు. రొమాంటిక్‌ కామెడీ ఎంటర్‌టైనర్‌గా ఈ సినిమా తెరకెక్కుతోంది. తెలుగు నేటివిటీకి తగ్గట్లుగా ఈ సినిమాలో కొన్ని మార్పులు చేర్పులు చేస్తున్నారు. సునీల్‌ బాడీ లాంగ్వేజ్‌కి తగ్గట్టుగా కథలో కొన్ని మార్పులు చేశారు. సునీల్‌ అంటే పంచ్‌ డైలాగ్‌లకు పెట్టింది పేరు. అందుకే ఈ సినిమాలో డైలాగ్స్‌పై ఎక్కువ కాన్‌సన్‌ట్రేషన్‌ చేశారట. ఎన్‌. శంకర్‌ దర్శకత్వంలో ఈ సినిమా తెరకెక్కుతోంది. ఈయనే ఈ సినిమాకి నిర్మాతగా వ్యవహరిస్తున్నారు. ఇషా తల్వార్‌, మమతా మోహన్‌దాస్‌ ప్లేస్‌లో తెలుగులో ముద్దుగుమ్మలు సంజన, మనీషాలు నటిస్తున్నారు. తాజాగా ఈ సినిమా టైటిల్‌ లోగోని విడుదల చేశారు. త్వరలోనే ఫస్ట్‌లుక్‌ విడుదల కానుంది. డిశంబర్‌లో సినిమాని ప్రేక్షకుల ముందుకు తీసుకొచ్చేందుకు సన్నాహాలు చేస్తోంది చిత్ర యూనిట్‌. 'ఉంగరాల రాంబాబు' సినిమాతో ఇటీవలే ప్రేక్షకుల ముందుకు వచ్చాడు సునీల్‌. ఈ మధ్య సునీల్‌కి సరైన హిట్‌ పడలేదు. దాంతో సూపర్‌ హిట్‌ రీమేక్‌ వైపు దృష్టి పెట్టాడు. ఈ రీమేక్‌తో సునీల్‌ హిట్‌ కొట్టడం ఖాయమంటున్నారు చిత్ర యూనిట్‌. కాగా సునీల్‌ హీరో అయ్యాక కమెడియన్‌గా అవకాశాలను వదులుకోవాల్సి వస్తోంది. అందుకు కారణం హీరోగా బిజీ షెడ్యూల్స్‌ ఉండడమే. అయితే ఇకపై స్టార్‌ హీరోల సినిమాల్లో కమెడియన్‌గా చేయడానికీ సునీల్‌ సిద్ధంగా ఉన్నాడనీ సమాచారమ్‌. అందులో భాగంగా చిరంజీవి 151వ చిత్రం 'సైరా నరసింహారెడ్డి'లో సునీల్‌ ఓ ఇంపార్టెంట్‌ రోల్‌ని పోషిస్తున్నాడనీ ప్రచారం జరుగుతోంది.