హీరో అయ్యాక సునీల్‌ కామెడీ పాత్రల్లో నటించింది లేదు. ఒకటి, అరా సినిమాల్లో జస్ట్‌ గెస్ట్‌లా కనిపించినా కానీ, అవి పెద్దగా చెప్పుకోదగ్గ పాత్రలు కావు. హీరోగా మంచి విజయాలే ఉన్నాయి సునీల్‌ కెరీర్‌లో. గతేడాది వరుసగా మూడు సినిమాలతో ప్రేక్షకుల ముందుకు వచ్చిన సునీల్‌ జస్ట్‌ ఫర్వాలేదనిపించాడు అంతే కానీ, పెద్దగా ఆకట్టుకోలేదు. అయితే ఈ సారి మాత్రం కొంచెం ఎక్కువే గ్యాప్‌ తీసుకుని ఓ సినిమాకి ఓకే చేశాడు. ఎన్‌. శంకర్‌ డైరెక్షన్‌లో సునీల్‌ కొత్త సినిమా ఓకే అయ్యింది. మరో పక్క సునీల్‌కి ఇంకో మెగా ఛాన్స్‌ వచ్చింది. మెగాస్టార్‌ రీ ఎంట్రీలో వచ్చిన మూవీ 'ఖైదీ నెంబర్‌ 150'లోనే సునీల్‌కి నటించే అవకాశం వచ్చింది. అయితే అప్పుడు సునీల్‌ వేరే సినిమాల్లో బిజీగా ఉండడం వల్ల అది కుదరకపోవడంతో ఆ ఛాన్స్‌ మిస్‌ చేసుకున్నాడు. ఆ ఛాన్స్‌ అలీ చేతికి వెళ్లిపోయింది. అయితే ఈ సారి చిరంజీవి చేయబోయే సినిమాలో ఖచ్చితంగా సునీల్‌ నటిస్తానంటున్నాడు. ఏది వదులుకున్నా, ఈ ఛాన్స్‌ మాత్రం ఈ సారి మిస్‌ కానంటున్నాడు ఈ భీమవరం బుల్లోడు. ఇక పోతే సునీల్‌ చేయబోయే కొత్త సినిమా త్వరలోనే సెట్స్‌ మీదికి వెళ్లనుంది. మలయాళంలో ఘన విజయం సాధించిన 'టూ కంట్రీస్‌' సినిమాకి రీమేకే ఈ సినిమా. ఈ సినిమాలో సునీల్‌ బాడీ లాంగ్వేజ్‌కి తగ్గట్లుగా కొన్ని మార్పులు చేర్పులు చేసి ఈ సినిమాను తెరకెక్కించాలనుకుంటున్నారట.