ప్రతీ భారత పౌరుడూ రేపు స్వాతంత్ర దినోత్సవ వేడులు ఘనంగా జరుపుకుంటాడు. కానీ, అంతకు ఒక్క రోజు ముందుగానే మెగా అభిమానులకు అసలు సిసలు పండగ వచ్చేసింది. 'సైరా' సెట్‌లో ఏం జరిగిందో ఆ విశేషాలను పంచుకుంటూ, చిత్ర యూనిట్‌ మేకింగ్‌ వీడియోని విడుదల చేసింది. ఫస్ట్‌ టీజర్‌కే సినిమా చూసినంత థ్రిల్‌ కలగజేసిన 'సైరా' టీమ్‌, మేకింగ్‌ వీడియోతో ఇప్పుడు మరోసారి మెస్మరైజ్‌ చేసింది. కీలక పాత్రధారులకు సంబంధించిన యాక్షన్‌ సన్నివేశాలతో ఈ మేకింగ్‌ వీడియోని కట్‌ చేశారు.
బిగ్‌బీ అమితాబ్‌, కిచా సుదీప్‌, జగపతిబాబు, విజయ్‌ సేతుపతి, తమన్నా, నయనతార, నిహారిక, రవికిషన్‌ తదితర పాత్రధారుల్ని ఒక్కొక్కరుగా చూపించారు. తమన్నా, నిహారిక కూడా యాక్షన్‌ సీన్స్‌ చేస్తున్నట్లు చూపించారు ఈ వీడియోలో. చివరిగా ఆంగ్ల సైనికులతో మెగాస్టార్‌ చిరంజీవి పోరాడుతున్న వైనం చూపించారు. అమిత్‌ త్రివేది బ్యాక్‌ గ్రౌండ్‌ మ్యూజిక్‌, రత్నవేలు సినిమాటోగ్రఫీ, హాలీవుడ్‌ స్టంట్‌ కొరియోగ్రాఫర్స్‌, నిర్మాత రామ్‌చరణ్‌, దర్శకుడు సురేందర్‌ రెడ్డి.. ఇలా అందరికీ ఈ వీడియోలో చోటు దక్కింది. బిగ్‌బీ అమితాబ్‌తో కలిసి పవన్‌ కళ్యాణ్‌ కనిపించడం వీడియోలో హైలైట్‌గా నిలిచింది.
టోటల్‌గా 'సైరా' మేకింగ్‌ వీడియో ఫ్యాన్స్‌కి ఫుల్‌ మీల్స్‌ పెట్టినంత తృప్తినిచ్చింది. ఇక్కడితో సైరా సందడి ఆగలేదు. ఈ నెల 20న టీజర్‌ విడుదల చేయనున్నట్లు ఈ సందర్భంగా ప్రకటించింది చిత్ర యూనిట్‌. ఇటీవలే చిత్రీకరణ పూర్తి చేసుకుని, పోస్ట్‌ ప్రొడక్షన్‌ పనుల్లో బిజీగా ఉన్న 'సైరా' గాంధీ జయంతిని పురస్కరించుకుని అక్టోబర్‌ 2న ప్రేక్షకుల ముందుకు రానుంది.
