మెగాస్టార్‌ చిరంజీవి హీరోగా నటిస్తోన్న 'సైరా నరసింహారెడ్డి' సినిమా షూటింగ్‌ శరవేగంగా సాగుతోంది. ఈ సినిమాలో తమిళ హీరో విజయ్‌ సేతుపతి ఓ కీలకమైన పాత్రలో కన్పిస్తోన్న సంగతి తెల్సిందే. తొలి తెలుగు స్వాతంత్య్ర సమరయోధుడైన ఉయ్యాలవాడ నరసింహారెడ్డి జీవిత చరిత్ర ఆధారంగా ఈ సినిమా తెరకెక్కుతోంది.
ఇప్పుడంటే రాష్ట్రాల వారీగా, ప్రాంతాల వారీగా, మతాల వారీగా విభేదాల్ని కొందరు సృష్టిస్తున్నారుగానీ, ఒకప్పుడు స్వాతంత్య్ర పోరాటంలో ఇవేమీ లేవు. అప్పట్లో దేశ స్వాతంత్య్రం కోసం అందరూ కలిసి పోరాడారు. ఆ పోరాటంలో తెలుగునాట ఉయ్యాలవాడ నరసింహారెడ్డి తనదైన ప్రత్యేకతను చాటుకుంటే, ఆ ఉయ్యాలవాడ నరసింహారెడ్డికి సహకరించిన తమిళ పోరాటయోధుడిగా విజయ్‌ సేతుపతి ఈ సినిమాలో నటించబోతున్నాడట. ఈ విషయాన్ని విజయ్‌ సేతుపతి స్వయంగా ప్రకటించాడు.
దాంతో, 'సైరా నరసింహారెడ్డి' సినిమా రేంజ్‌ ఒక్కసారిగా పదింతలయ్యింది. ఇండియన్‌ ఫిలింగా ఇప్పటికే 'సైరా నరసింహారెడ్డి' గురించిన ప్రచారం జరుగుతున్నా, ఈ స్థాయిలో సినిమాకి సంబంధించి ఇంపార్టెంట్‌ ఎలిమెంట్‌ రివీల్‌ అవడం ఇదే తొలిసారి.
తొలి తెలుగు స్వాతంత్య్ర యోధుడి పోరాటమే కాదు, ఇది తెల్లదొరలకు వ్యతిరేకంగా జరిగిన భారతీయుడి పోరాటమనీ, ఆ కారణంగా 'సైరా నరసింహారెడ్డి' సినిమా జాతీయ స్థాయిలో సత్తా చాటే అవకాశముందని సినీ పరిశీలకులు అంచనా వేస్తున్నారు.
