క్రికెట్‌లో సెంచ‌రీ అనే ప‌దానికి చాలా ప్రాధాన్యం ఉంది. సినిమాల్లోనూ ఈ అంకె.. ఓ మ్యాజిక్ ఫిగ‌ర్‌గా మారిపోయింది. ఇది వ‌ర‌కు ఓ సినిమా వందాడితే గొప్ప‌. ఇప్పుడు... వంద కోట్లు సాధిస్తే గొప్ప‌. విడుద‌ల‌కు ముందే భారీ బిజినెస్ తో వంద కోట్లు అందుకున్న సినిమాలు కూడా కొన్ని ఉన్నాయి. ఆ జాబితాలో చేరే అరుదైన అవ‌కాశాన్ని కోల్పోయాడు రామ్‌చ‌ర‌ణ్‌.  

బోయ‌పాటి శ్రీ‌ను ద‌ర్శ‌కుడిగా రామ్ చ‌ర‌ణ్ క‌థానాయ‌కుడిగా `విన‌య విధేయ రామ‌` తెర‌కెక్కిన సంగ‌తి తెలిసిందే. ఈ చిత్రానికి ప్రీ రిలీజ్ బిజినెస్ ముగిసింది. అన్ని ఏరియాల్లోనూ క‌లిపి రూ.95 కోట్ల బిజినెస్ జ‌రుపుకుందీ సినిమా. అంటే... రూ.5 కోట్ల తేడాతో సెంచరీ మిస్ అయ్యింద‌న్న‌మాట‌. అయితే... ప్రీ రిలీజ్ బిజినెస్ ప‌రంగా చ‌ర‌ణ్ కెరీర్‌లో ఇదే రికార్డు.

'రంగ‌స్థ‌లం' ఏకంగా రూ.120 కోట్లు సాధించ‌డంతో.. ఈ సినిమాకి మంచి డిమాండ్ ఏర్ప‌డింది. పైగా సంక్రాంతి సీజ‌న్‌. బోయ‌పాటి శ్రీ‌నుకంటూ ఓ వ‌ర్గం ఫ్యాన్స్ ఉన్నారు. అందుకే ఈ సినిమాకి ఈ స్థాయి బిజినెస్ జ‌రిగింది. ఒక్క నైజాంలోనే ఈ సినిమా రూ.20 కోట్ల‌కు అమ్ముడుపోయింది. ఓవ‌ర్సీస్‌లో రూ.15 కోట్ల వ‌ర‌కూ ప‌లికింది. కైరా అద్వానీ క‌థానాయిక‌గా న‌టించిన ఈ చిత్రం జ‌న‌వ‌రి 11న విడుద‌ల అవుతోంది.