క‌థానాయిక‌గా దేశ వ్యాప్తంగా ఓ వెలుగు వెలిగింది ట‌బు. తెలుగులో అయితే గ్లామ‌రెస్ క‌థానాయిక‌గా రాణించింది. ఇప్పుడు ప‌లు ప్రాధాన్యమున్న పాత్ర‌ల్లో న‌టిస్తోంది. తెలుగులో ఓ పాత్ర కోసం ట‌బుని ప‌రిగ‌ణ‌లోనికి తీసుకోవ‌డం చాలా అరుదు. అయితే ఇప్పుడు ఆమెకు మంచి మంచి అవ‌కాశాలు వ‌స్తున్నాయి. అల్లు అర్జున్ - త్రివిక్ర‌మ్ కాంబినేష‌న్‌లో ఓ చిత్రం రూపుదిద్దుకుంటున్న సంగ‌తి తెలిసిందే. ఈ చిత్రంలో ఓ కీల‌క పాత్ర కోసం ట‌బు పేరు ప‌రిశీలిస్తున్నార‌ని స‌మాచారం.
ఈలోగా మ‌రో వార్త బ‌య‌ట‌కు వ‌చ్చింది. బ‌న్నీ సినిమాతో పాటు రానా సినిమాలోనూ ట‌బు క‌నిపించ‌నున్న‌ద‌ని తెలుస్తోంది. రానా క‌థానాయ‌కుడిగా వేణు ఉడుగుల ద‌ర్శక‌త్వంలో ఓ చిత్రం రూపుదిద్దుకుంటోంది. సురేష్ ప్రొడ‌క్ష‌న్స్ నిర్మిస్తోంది. సాయి ప‌ల్ల‌వి క‌థానాయిక‌గా న‌టిస్తోంది. ఈ చిత్రంలో ఓ కీల‌క పాత్ర కోసం ట‌బుని ఎంచుకున్నార‌ని స‌మాచారం. ఈ చిత్రంలో ఆమె ఓ ఉద్య‌మ నేత‌గా క‌నిపించబోతోంద‌ని తెలుస్తోంది. ఈ సినిమా కూడా ఒప్పుకుంటే.. ట‌బు చేతిలో రెండు తెలుగు సినిమాలు ప‌డిన‌ట్టే. ఉగాది త‌ర‌వాత బ‌న్నీ సినిమా మొద‌ల‌వుతుంది. జూలై నుంచి రానా సినిమా సెట్స్‌పైకి వెళ్ల‌నుంది.
