సంక్రాంతికి 'ఎఫ్‌ 2'తో బ్లాక్‌ బస్టర్‌ హిట్‌ అందుకున్న అనిల్‌ రావిపూడి అదే ఉత్సాహాన్ని కంటిన్యూ చేస్తూ ఈ సినిమాకి సీక్వెల్‌ రూపొందించనున్నారు. అది కూడా ఎప్పుడో కాదు, త్వరలోనే. వెంకటేష్‌, వరుణ్‌ తేజ్‌ హీరోలుగా రూపొందించిన 'ఎఫ్‌ 2'కు అప్‌డేట్‌ వెర్షన్‌గా 'ఎఫ్‌ 3'ని రూపొందించనున్నాడట అనిల్‌ రావిపూడి. ఇప్పుడిదే టాలీవుడ్‌లో పెద్ద హాట్‌ టాపిక్‌గా నిలిచింది. 

ఇదిలా ఉంటే, అసలు సిసలు సంగతేంటంటే ఈ సినిమాని ఇద్దరు స్టార్స్‌తో కాదు, ముగ్గురు స్టార్స్‌తో రూపొందించాలన్నది అనిల్‌ రావిపూడి ఆలోచనని ప్రచారం జరుగుతోంది. అయితే ఆ మూడో స్టార్‌ ఎవరనే విషయమై అనిల్‌ రావిపూడి ఇంకా తేల్చుకోలేకపోతున్నాడట. అయితే ఆడియన్స్‌ పోల్‌ ప్రకారం ఆ మూడో స్టార్‌ రవితేజ అని ప్రచారం జరుగుతోంది. రవితేజతో అనిల్‌ రావిపూడి 'రాజా ది గ్రేట్‌' సినిమాతో సూపర్‌ హిట్‌ కొట్టాడు. ఆ మాటకొస్తే, అనిల్‌ చేసినవి నాలుగు సినిమాలు. ఆ నాలుగూ సూపర్‌ హిట్సే. 

ఇదిలా ఉంటే, ఆ మూడో స్టార్‌గా సునీల్‌ని తీసుకునే యోచనలో అనిల్‌ రావిపూడి ఉన్నాడనీ అత్యంత విశ్వసనీయ వర్గాల సమాచారమ్‌. రవితేజ విషయంలో ఈక్వేషన్స్‌ కరెక్ట్‌గా సెట్‌ కావట్లేదట. సునీల్‌ అయితే బాగుంటుందని భావిస్తున్నాడట. ఒకవేళ ఇదే జరిగితే సునీల్‌ దశ తిరిగినట్లే. అతి త్వరలో సెట్స్‌ మీదికెళ్లనున్న ఈ సినిమాని వేంకటేశ్వర క్రియేషన్స్‌ బ్యానర్‌లో దిల్‌రాజు నిర్మించనున్నారు.