బాలీవుడ్‌లో 'బాఘి' సిరీస్‌లో వచ్చిన రెండు చిత్రాలూ మంచి విజయం అందుకున్నాయి. ప్రముఖ నటుడు జాకీష్రాఫ్‌ తనయుడు టైగర్‌ ష్రాఫ్‌ హీరోగా రూపొందిన ఈ సినిమాలు రెండూ తెలుగులో మంచి విజయం అందుకున్న 'వర్షం', 'క్షణం' సినిమాలకు రీమేక్‌గా తెరకెక్కాయి. యాక్షన్‌ హీరోగా మంచి పేరు తెచ్చుకున్న టైగర్‌ ష్రాఫ్‌ తనదైన యాక్షన్‌ కంటెన్ట్‌తో ఈ రీమేక్‌ సినిమాలకు కొత్త గ్లామర్‌ తీసుకురావడమే కాకుండా, సూపర్‌ డూపర్‌ హిట్స్‌ కూడా అందుకున్నాడు. 

ఇక ఈ సిరీస్‌లో మూడో సినిమా తెరకెక్కనుందని ఇటీవల అనౌన్స్‌ చేసిన సంగతి తెలిసిందే. అయితే ఈ సినిమాకి ప్రేరణ ఏంటంటే, మళ్లీ ఓ సౌత్‌ సినిమానే అని తెలుస్తోంది. అయితే ఆ సౌత్‌ సినిమా ఏందంటే, పలు పేర్లు పరిశీలనలో ఉన్నాయి. తెలుగు సినిమానే అని తెలుస్తోంది. స్టైలిష్‌ స్టార్‌ అల్లు అర్జున్‌ నటించిన సినిమా అని చూచాయగా బాలీవుడ్‌ వర్గాల్లో గుసగుసలు వినిపిస్తున్నాయి. ఏమో అయినా కావచ్చు. 

మనోడికి అల్లు అర్జున్‌ అంటే చాలా ఇష్టం. సౌత్‌ హీరోల్లో ఎవరంటే ఇష్టం అంటే బన్నీ అని చెప్పేశాడు. సో ఈ సారి 'బాఘి 3' సినిమా కోసం టైగర్‌ ష్రాఫ్‌ బన్నీ సూపర్‌ హిట్‌ చిత్రాలపై కన్నేసినట్లు బాలీవుడ్‌ సమాచారమ్‌. అయితే అది ఏ సినిమా అవుతుందనేది ప్రస్తుతానికి సస్పెన్సే. కానీ త్వరలోనే రివీల్‌ కానుందట. ఈ సినిమాలో శ్రద్ధాకపూర్‌ హీరోయిన్‌గా నటిస్తోంది.