బాలీవుడ్‌ యాక్షన్‌ హీరోగా పేరు తెచ్చుకున్న అజయ్‌ దేవగణ్‌ ప్రధాన పాత్రలో ఓ బయోపిక్‌ రూపొందుతోంది. హైద్రాబాద్‌కి చెందిన ఫుట్‌బాల్‌ లెజెండ్‌ సయ్యద్‌ అబ్ధుల్‌ రహీమ్ జీవిత గాధ ఆధారంగా ఈ సినిమా రూపొందుతోంది. ఈ సినిమాని హిందీతో పాటు, తెలుగు, తమిళ భాషల్లోనూ రిలీజ్‌ చేయనున్నారట. బాలీవుడ్‌ హీరోలైన అమీర్‌ఖాన్‌, షారూఖ్‌ ఖాన్‌ తదితరులకు తెలుగులో కూడా మంచి పేరుంది.
అప్పుడప్పుడూ ఈ హీరోలు నటించిన సినిమాలు తెలుగులోకి డబ్‌ అవుతుంటాయి. కానీ ఇంతవరకూ అజయ్‌దేవగన్‌ నటించిన సినిమాలకు తెలుగులో అస్సలు సీను లేదు. కానీ ఇకపై సౌత్‌ సినిమాల పైనా అజయ్‌దేవగణ్‌ ఫోకస్‌ పెట్టినట్లు తెలుస్తోంది. ఈ తాజా సినిమాతో అజయ్‌దేవగణ్‌ సౌత్‌లో ఎంట్రీ ఇస్తున్నాడన్న మాట. ఈ సినిమాలో కీర్తిసురేష్‌ హీరోయిన్‌గా నటిస్తోంది. తెలుగు, తమిళ భాషల్లో కీర్తిసురేష్‌కి మంచి పాపులారిటీ ఉందిప్పుడు.
'ఆర్కిటెక్ట్‌ ఆఫ్‌ ఇండియన్‌ ఫుట్‌బాల్‌' అని అభిమానులు ముద్దుగా పిలచుకునే సయ్యద్‌ అబ్దుల్ రహీమ్ భార్య పాత్రలో కీర్తిసురేష్‌ నటిస్తోంది. ఈ పాత్ర సినిమాకు అత్యంత కీలకం. అందుకే ఏరికోరి ఆమెను ఈ పాత్ర కోసం ఎంచుకున్నారు. ఏది ఏమైనా బాలీవుడ్‌ ఎంట్రీ మూవీకే పర్‌ఫామెన్స్‌ బేస్‌డ్‌ క్యారెక్టర్‌ కీర్తిని వరించడం ఓ విశేషం అయితే, హైద్రాబాద్‌ ఫుట్‌బాల్‌ లెజెండ్‌ అయిన సయ్యద్‌ అబ్దుల్ రహీమ్ బయోపిక్‌తో అజయ్‌దేవగణ్‌ తెలుగులోకి ఎంట్రీ ఇవ్వడం మరో విశేషం.
