హరిప్రసాద్‌ జక్కా దర్శకత్వంలో తెరకెక్కుతోన్న సినిమా 'దర్శకుడు'. సుకుమార్‌ రైటింగ్స్‌ బ్యానర్‌పై ఈ సినిమా తెరకెక్కుతోన్న సంగతి తెలిసిందే. అయితే ఈ సినిమాకి మెగా పబ్లిసిటీ బాగా తోడయ్యింది. ఆడియో ఫంక్షన్‌కి రామ్‌ చరణ్‌ గెస్ట్‌గా హాజరు కాగా, ఈ సినిమా తొలి టికెట్‌ని ఏకంగా మెగాస్టార్‌ చిరంజీవి కొనడం గొప్ప విశేషం. అంటే 'దర్శకుడు' సినిమాకి మెగాస్టార్‌ తొలి ప్రేక్షకుడన్న మాట. మెగాస్టార్‌ చిరంజీవి సినిమాకి తొలి ప్రేక్షకుడు కావాలనీ ప్రతీ ఒక్కరూ ఆరాటపడుతూ ఉంటారు. అలాంటి ప్రేక్షకుల లిస్ట్‌లో ఉన్నవాళ్లలో ఈ సినిమా దర్శకుడు జక్కా, సుకుమార్‌ కూడా ఉండడం విశేషం. ఆలాంటిది తమ సినిమాకి మెగాస్టార్‌ తొలి ప్రేక్షకుడు కావడం చాలా సంతోషంగా ఉందని ఈ ఇద్దరితో పాటు, చిత్ర యూనిట్‌ అంతా ఆనందం వ్యక్తం చేస్తోంది. ఈ సినిమా ఆగష్టు 4న ప్రేక్షకుల ముందుకు వస్తోంది. ఈ సందర్భంగా ఈ సినిమా మెగా ప్రశంసలు అందుకుంది. సుకుమార్‌ సమర్పణలో ఈ సినిమా రూపొందుతోందంటనే ఈ సినిమాలో ఆయనకి సంబంధించిన విషయం ఏదో కనెక్ట్‌ అయి ఉంటుందనీ చిరంజీవి అన్నారు. అలాగే ఈ సినిమాలో హీరోగా నటిస్తున్న అశోక్‌కి కూడా మెగా ప్రశంస దక్కింది. మంచి హీరో మెటీరియల్‌ అని చిరంజీవి అశోక్‌ని ప్రశంసించారు. ఈ సినిమా మంచి విజయం సాధించాలని చిరంజీవి తన బెస్ట్‌ విషెస్‌ అందించారు. మరోపక్క సుకుమర్‌ దర్శకత్వంలో మెగా తనయుడు రామ్‌ చరణ్‌ 'రంగస్థలమ్‌' సినిమా తెరకెక్కుతోన్న సంగతి తెలిసిన విషయమే.